पोखरा । लमजुङ र छिमेकी जिल्लामा समेत प्रचलित ठाडोभाका लोकगीतसम्बन्धी अनुसन्धानात्मक पुस्तक लमजुङे ठाडोभाका प्रकाशित भएको छ । प्रज्ञा प्रतिष्ठानको लोकसंगीत विभागको स्वीकृत कार्यक्रमअन्तर्गत पूरा भएको अनुसन्धानपत्रलाई पुस्तकको स्वरुप दिई प्रकाशन गरिएको हो । दुरा जातिमा प्रचलित ठाडोभाका संरक्षण, सम्वद्र्धन र अभिलेखीकरण गर्ने उद्देश्यका साथ पुस्तक प्रकाशन गरिएको बताइएको छ ।

अनुसन्धाता मुक्तिनाथ घिमिरेले आव २०७६/७७ मा लोकसंगीत विभागको अनुसन्धान परियोजना अन्तर्गत तयार पारेको अनुसन्धानपत्रलाई प्रतिष्ठानले पुस्तकको रुप दिई प्रकाशन गरेको हो ।

पुस्तकलाई ५ अध्याय र परिशिष्ट खण्डमा विभाजन गरी प्रस्तुत गरिएको छ । जसमा ऐतिहासिक पृष्ठभूमि, दुरा जातिको परिचय, वासस्थान र तथ्यांक, दुरा जातिका संस्कार, धर्म तथा परम्परा, दुरा जातिको संस्कृति, लमजुङे ठाडोभाका गीतको चिनारी, उत्पत्ति र विकास तथा ठाडोभाका गीतका विशेषताका बारेमा उल्लेख छ ।

लोकसंगीत विभाग प्रमुख प्राज्ञ हरिदेवी कोइरालाले पुस्तकमा साहित्यिक, भाषिक, सांगीतिक, नाटकीय, दार्शनिक, मनोवैज्ञानिक, अस्तित्ववाद, शैक्षिक, समाजशास्त्रीय तथा मानवशास्त्रीय दृष्टिकोण समेतको विश्लेषण गरिएको बताइन् । ठाडोभाकाका सर्जक देउबहादुर दुरादेखि आधुनिक पुस्ताका युवाका गीतसमेत समेटेर त्यसको विश्लेषण गरिएको प्राज्ञ कोइरालाले बताइन् ।