पोखरा, ९ मंसिर । पोखराको मालेपाटनमा शुक्रबार राति मोटरसाइकल दुर्घटना हुँदा चालक गम्भीर घाइते भएका छन् ।
विन्ध्यवासिनीतिरबाट जिरो किमीतर्फ जाँदै गरेको ग२३प २७३० नम्बरको एफजेड मोटरसाइकल राति १० बजे नबिल बैंक अगाडि दुर्घटनामा परेको हो । घाइते चालकको पहिचान खुल्न सकेको छैन । उनको जिरोस्थित रिजनल हस्पिटलको आकस्मिक कक्षमा उपचार भइरहेको प्रहरीले जनाएको छ ।

रातिको समय र गाईले झुक्याउँदा तीव्र गतिको मोटरसाइकल डिभाइरमा ठोक्किन पुगेको प्रत्यक्षदर्शीले जनाए ।‘मोटरसाइकलमा माथिबाट आउँदै थियो । सडकको बीचमा गाई हिडेको थियो । एक्कासि झुक्याउँदा डिभाइडरमा ठोक्किएको हो,’ एक प्रत्यक्षदर्शीले भने ।

मोटरसाइकलमा चालकसहित अर्का एक जना पनि सवार रहेको भनिए पनि यकिन हुन सकेको छैन । दुर्घटनापछि चालकलाई दाइ, दाइ भन्दै बोलाएका व्यक्ति धेरैबेरसम्म नउठेपछि त्यहाँबाट फरार भएको स्थानीयको आशंका छ । जिरोमा सवारी चेकजाँचमा बसेका प्रहरीले घटनाको अनुसन्धान भइरहेको जनायो । दुर्घटनापछि प्रहरीसहित स्थानीयको ठूलो भिड लागेको थियो ।

पोखरा–बागलुङ राजमार्गअन्तर्गत पर्ने सो सडकको केही वर्षअघि स्तरोन्नति गरिए पनि सडकमा बत्ती नहुँदा रातको समयमा दैनिकजसो दुर्घटना हुने गरेको छ ।