पोखरा । आइतबार हुने प्रतिनिधिसभा तथा प्रदेशसभा चुनावको लागि पोखरा १९ का मतदान केन्द्र अपांगमैत्री बनाइएको छ ।

स्थानीय अकला मतदान केन्द्र र भारती भवन मतदान केन्द्रलाई अपांग तथा अशक्त मतदानमैत्री पदमार्ग निर्माण गरिएको वडा १९ का सचिव श्रीराम पौडेलले जानकारी दिए ।

प्रदेश निर्वाचन कार्यालय तथा जीवन पद्दति स्वावलम्बन पोखराको समन्वयमा आईएफइसीको ३ लाख ५७ हजार रुपैयाँ लागतमा अपांगमेत्री पदमार्ग निर्माण गरिएको हो । अपांग तथा अशक्त मतदाताले सहजरुपमा मतदान गर्न पाउन् भन्ने उद्देश्यले पदमार्ग निर्माण गरिएको वडा १९ का अध्यक्ष पुष्पेन्द्र पाण्डेले बताए ।

सो मार्गको वडाध्यक्ष पाण्डे, सचिव पौडेल लगायतले अनुगमन समेत गरेका छन् ।

निर्वाचनमा पोखरा १९ मा करिब ८ हजार मतदाता छन् । पोखरा १९ को ग्रामीण भेगको रूपमा रहेको घार्मीका मतदाताले त्यहाँ अस्थायी मतदान केन्द्र राख्न पटक पटक माग गरेकोमा माग पूरा हुन भने सकेको छैन । मतदान केन्द्र टाढा हुँदा वृद्धवृद्धालाई असहज भएको छ । उनीहरू घण्टौं हिडेर आफ्नो मताधिकार प्रयोग गर्न अकला मतदान केन्द्रमा आउने गरेका छन् ।