पोखरा । सिद्धार्थ बैंक बुद्धचोक शाखाले पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पताललाई १ लाख ४० हजार बराबरको कुर्ची सहयोग गरेको छ । संस्थागत सामाजिक उत्तरदायित्वअन्तर्गत बैंकका शाखा प्रबन्धक विष्णुप्रसाद शर्माले सोमबार अस्पतालका निर्देशक डा.भरतबहादुर खत्रीलाई कुर्ची हस्तान्तरण गरेका हुन् ।

शर्माले अस्पतालको प्रसूति बार्डमा बिरामीका कुरुवालाई सहज पुग्ने हेतुले उक्त रकम बराबरको १७ वटा कुर्ची सहयोग गरिएको बताए । ‘बिरामीका आफन्त वा कुरुवालाई सहज बसाइका लागि कुर्ची सहयोग गरेका हौं,’ उनले भने, ‘विगतदेखि नै सामाजिक उत्तरदायित्वअन्तर्गत विभिन्न क्षेत्रमा सहयोग गर्दै आएका थियौ । आगामी दिनमा पनि यो सहयोग जारी रहनेछ ।’

अस्पताल निर्देशक खत्रीले बैंकको यो सहयोगप्रति आभार व्यक्त गरे । उनले कुर्चीको सदुपयोग भएर बिरामीका कुरुवालाई सहज हुने बताए ।