पोखरा, १४ कात्तिक । अमरसिंह ब्वाईज क्लबले पहिलो पटक एट ए साइड भेट्रान्स फुटबल प्रतियोगिता आयोजना गर्ने भएको छ ।
अमरसिंहचौरको खेल मैदानमा कात्तिक १७ देखि ४५ वर्ष उमेर समूहको सो प्रतियोगिता हुने भएको हो ।

प्रतियोगितामा पोखरा, चितवन, हेटौडा, काठमाडौं, बुटबल र धनगढीका गरी १२ टोलीको प्रतिस्पर्धा रहने क्लबका अध्यक्ष एवं प्रतियोगिता संयोजक राजेश गुरुङले जानकारी दिए । प्रतियोगितामा आयोजक अमरसिंह क्वाइजको सेतो र नीलो गरी २ टोलीले प्रतिस्पर्धा गर्ने छन् ।

हेटौडा, एक्स पोखरा, लेकसाईड, नाईटकिङ, र चितवन एउटा समूहमा छन् । त्यस्तै आयोजक अमरसिंह ब्वाइजको नीलो, फ्रिडम फाइटर, एक्स वारियर, बुटवल, गण्डकी प्रदेश र धनगढी अर्को समूहमा छन् ।
पहिलो खेल आयोजक अमरसिंह ब्वाईज सेतोले एक्स पोखरासँग खेल्दै प्रतियोगिताको शुरुवात गर्ने छ ।

विजेताले नगद १ लाख ५५ हजार ५५५ रुपैयाँसहित शिल्ड प्राप्त गर्ने छ । उपविजेताले नगद ७७ हजार ७ सय ७७ रुपैयाँ प्राप्त गर्ने छ । खेलमा म्यान अफ दि टुर्नामेन्टले नगद १० हजार प्राप्त गर्दा उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर र उत्कृष्ट प्रशिक्षकले नगद ५÷५ हजार रुपैयाँसहित ट्रफी प्राप्त गर्ने छन् ।