पोखरा । नवौं राष्ट्रिय खेलकुदमा स्वर्णको ह्याट्रिक हिरो अमृत थापाले आफ्नो मेडल फुकालेर कसैलाई लगाइदिंदै थिए । नजिकबाट नचिनेकाले त्यो दृष्य देख्नासाथ ‘के गर्‍या होला’ भन्न थाले । तर, आफ्नो मेडल अरुको गलामा भिरिदिन उनलाई केही जस्तो लागेको थिएन । हाँसीहासी मेडल लगाइदिएर हात मिलाउन भ्याए । मेडल पहिरिने ती व्यक्तिले पनि स्यावासी दिंदै अंकमाल गर्न भ्याए ।

सोमबार स्क्वास कोर्टको यो दृष्यले सबैको ध्यान खिचेको थियो । स्क्वासमा प्रथम भएका अमृत लगातार ३ राष्ट्रिय खेलकुदमा स्वर्ण जित्न सफल भएका हुन् । खुसी साट्नेक्रममा उनी एक महिलासँग निकै खुसी थिए । थापाले भन्दै थिए, ‘तपाईले पनि जितेपछि दुबै जनाको स्वर्ण पदक देखाएर फोटो खिच्नुपर्छ ।’

स्क्वास कोर्टमा भेटिएका ती पुरुष अमृतका बुवा र महिला उनका दिदी भन्ने थाहा भएपछि सबै चकित परे ।

उनीहरु तीनै जना राष्ट्रिय खेलकुदमा स्क्वास खेल्न पोखरा आएका हुन् । अमृत र उनकी दिदी कृष्णा थापा खेल्न आएका हुन् । भने, बुवा हिराबहादुर थापा प्रशिक्षक । परिवार नै स्क्वासमा आवद्ध भएको थाहा पाएपछि त्यहाँ उपस्थित सबै चकित परे । अनि भन्न भ्याए, ‘आहा ! कति राम्रो । परिवार नै सबै स्क्वास खेलाडी ।’

अमृत र कृष्णालाई स्क्वासमा लाग्न प्रेरित गर्ने बाबु हिराबहादुर हुन् । उनी नेपाली खेलकुद जगतमा एक दुर्लभ उदाहरण हुन् । उनी आफ्नो खेल करियरमा लगातार १७ पटक राष्ट्रिय च्याम्पियन बने ।

च्याम्पियन बाबुको पदचाप पछ्याउँदै छोराछोरी नै लागेका हुन् । गोरखामा जन्मिएका अमृत हाल ललितपुर बस्छन् । उनको घर नजिकै स्क्वास कोर्ट छ । सानोमा बाबुको पछि लाग्दै कोर्ट धाउँदाधाउँदै उनी पनि अन्ततः खेलाडी बनेर निस्किए ।

परिवार नै स्क्वासमा आवद्ध भएको थाहा पाएपछि त्यहाँ उपस्थित सबै जना चकित परे

२०७३ सालमा बाबु हिराबहादुरले खेलजीवनबाट सन्न्यास लिएपछि छोराछोरीलाई प्रशिक्षक बनेर साथ दिंदै आएका हुन् । उनी अहिले राष्ट्रिय खेलकुद परिषद्मा स्क्वास प्रशिक्षक छन् । उनले स्क्वास खेलाडी र सिक्न चाहने सबैलाई छोराछोरीकै रुपमा सिकाउने गर्छन् । बाबुकै साथ र प्रशिक्षणले सफल भएको भन्दै आफूले जितेको मेडल बाबुलाई लगाइदिएको अमृतले स्पष्ट पारे ।

पाँचौं राष्ट्रिय खेलकुद प्रतियोगिताबाट नै सहभागिता जनाउन थालेको उनले जानकारी दिए । त्यो बेला बाबुछोरा नै कोर्टमा थिए । अनुभव कमीका कारण उनले त्यो बेला कुनै पदक ल्याएनन् । तर, बाबाले स्वर्ण ल्याए । छैटौंमा उनको सहभागिता रहेन । ‘हुन त म पाँचौं राष्ट्रियदेखि नै खेल्न थालेको हुँ तर त्यतिबेला सानो थिएँ । एक्स्पेरियन्स पनि थिएन । त्यस्तो ठूलो अचिभमेन्ट भएन,’ उनले भने, ‘छैटौंमा एसएलसीको तयारीका लागि होस्टेलमा भएर खेल्न पाइनँ । त्यसपछि कन्टिन्यू थ्री टाइम्स गोल्ड मेडलिस्ट बनें ।’

सातौं संस्करण हुँदा बाबुले सन्यास लिइसकेका थिए । बाबु नभए पनि कोर्टमा होमिएका अमृतले स्वर्ण हात पारे । त्यसबेला बाबाको खेलको निरन्तरता भएको उनले सम्झे । उमेर २६ वर्ष टेकेका अमृतको स्क्वासमा अझै उपाधि जित्ने धोको छ । अमृतले साउथ एसियन गेम्स, एसियन गेम्स खेलिसकेका छन् ।

भाइको प्रगति देखेरै उनकी दिदी पनि कोर्ट धाउन थालिन् । भाइको प्रगति र बाबको साथले खेलाडी बनेको कृष्णा बताउँछिन् । उनले पनि छैटौं राष्ट्रिय प्रतियोगिताबाट भाग लिन थालिन् । पहिलो पटक नै कास्य जितेकी उनले सातौंमा रजत र आठौंमा स्वर्ण जितेकी थिइन् ।

उनको सेमिफाइनल खेल मंगलबार छ । सेमिफाइनल जितेर यो पटक पनि स्वर्ण जित्ने उनको इच्छा छ । ‘प्रिपियर राम्रै गरेर आएको छु । यहाँ आएका सबैको टार्गेट गोल्ड नै हुन्छ,’ उनले भने, ‘मैले पनि यो पटक स्वर्ण जित्ने नै लक्ष्य लिएको छु । गेम हो हारजती त हुन्छ नै तर आफ्नो खेलको स्तर अझ राम्रो बनाम भन्ने हुन्छ ।’ स्वर्ण जितेमा दिदीभाइकै पदक झुन्ड्याउने सपना पूरा हुने उनले दृढ आशा व्यक्त गरिन् ।

अमृत र कृष्णाले जतिपनि राष्ट्रिय खेलकुद खेले सबै गण्डकी प्रदेशबाट खेलिरहेका छन् । आगामी दिनमा यसलाई निरन्तरता दिंदै महिला खेलाडी उत्पादनमा जोड दिने उनीहरुको योजना छ ।