पोखरा । नवौं राष्ट्रिय खेलकुदअन्तर्गत फुुल कन्ट्याक्ट करातेमा गण्डकी प्रदेश, नेपाल आर्मी र सशस्त्र प्रहरीले समान ३/३ वटा स्वर्ण जितेका छन् ।

कराँतेमा पुुरुषका ७ र महिलाका ५ विधा गरी १२ विधामा भएको प्रतिष्पर्धामा गण्डकीले पुरुषफर्तको ३०—४०, ४५—५० तौल समूहमा स्वर्ण र महिलातर्फको ५०—५५ तौल समूहमा १ स्वर्ण जितेको हो ।

आर्मीले खुला तौल समूह पुरुष, महिला र पुरुषातर्फ ६०—६५ केजी तौल समूहमा स्वर्ण जितेको हो । एफिएफले महिलातर्फ ४५ केजीमुनि र ५० केजीमुनि तौल समूह र पुरुषतर्फको ४५ केजीमुनि तौल समूहमा स्वर्ण जितेको हो ।

पुरुषतर्फ खुला तौल समूहमा आर्मीका विजय सिंहले स्वर्ण जिते । उनले गण्डकीका रुपक नेपालीलाई फाइलनमा पराजित गरी स्वर्ण जितेका हुन् ।

पुरुषतफ ६०—६५ केजी तौल समूहमा आर्मीका सनी सिंहले गण्डकीका शिव भुजेललाई पराजित गरी स्वर्ण जिते ।

५५—६० केजी तौल समूहमा नेपाल प्रहरीका सुशान लामिछानेले स्वर्ण र नेपाल आर्मीका विकास गुरुङले रजत जिते ।

५०—५५ केजी तौल समूहमा मधेशका धरमिन्दर रामले स्वर्ण जित्दा आर्मीका चोकबहादुर बुढाथोकीले रजत पाए ।

४५—५० केजी तौल समूहमा गण्डकीका अनीष बुढामगरले वागमतीका विजय राईलाई पराजित गरी स्वर्ण जिते । वागमतीका राईले रजत पदकमा चित्त बुझाए । ४०—४५ केजी तौल समूहमा एफिएफका सुनिल तामाङले स्वर्ण जिते । आर्मीका राजकुमार यादवले रजत पदक पाए ।

३५—४० तौल समूहमा गण्डकीका अभिषेक डिमडुङले नेपाल आर्मीका सागर थिङलाई फाइनलमा पराजित गरी स्वर्ण जितेका छन् । थिङले रजत पाए ।

महिलातर्फ खुला तौल समूहमा आर्मीकी मञ्जु विकले स्वर्ण र वागमतीकी निशा बोहोराले रजत पाइन् ।

५०—५५ केजी तौल समूहमा गण्डकीकी धनी रानामगरले आर्मीकी पत्रिका चन्दलाई पराजित गरी स्वर्ण जिते । ४५—५० केजी तौल समूहमा सशस्त्र प्रहरीकी करिष्मा कार्कीले वागमती प्रदेशकी नवीना घमाललाई पराजित गरी स्वर्ण जित्दा घमालले रजत पदक जितिन् । ४० देखि ४५ केजी तौल समूहमा एपिएफकी रीना माझीले नेपाल प्रहरीकी अञ्जना ढुंगेललाई पराजित गरी स्वर्ण जितेकी छन् भने ढुंगेलले रजत पदक जितिन् । पोखराको प्रदर्शनी केन्द्रमा भएको खेलमा ११ टिमले भाग लिएका छन् ।