कृष्ण खाँण स्याङ्जाको वालिङ नगरपालिकाका प्रमुख हुन् । यो नगरपालिका अहिले आफूलाई स्मार्ट सिटीको रुपमा उभ्याउन प्रयासरत छ । वालिङलाई नेपालकै नमूना नगरपालिकाको रुपमा विकास गर्न खाँणलगायतको समूह निरन्तर लागि परेको छ । खाँण नेकपा (एमाले), स्याङ्जा जिल्ला उपाध्यक्ष पनि हु्न् । तत्कालीन नेपाल प्रगतिशील विद्यार्थी युनियनमार्फत् २०३८ सालबाट उनको राजनीतिक यात्रा सुरु भयो । २०४१ सालको एसएलसीपछि उनी पोखराको पृथ्वीनारायण क्याम्पसमा अध्ययनका लागि पुगे । अनेरास्ववियुमा आबद्ध भएर विद्यार्थी राजनीतिलाई अगाडि बढाए । यससँगै २०४४ सालबाट वालिङकै पूर्णामृत माविमा अध्यापन गराउन थाले । २०४६ सालको पञ्चायत विरोधी आन्दोलनका क्रममा उनी एक महिना जेल पनि परे । बहुदलको घोषणासँगै उनी रिहा भए र तत्कालीन धनुबास गाविसमा गाउँ कमिटीको उपसचिव हुँदै सचिव बने । २०५४ सालको चुनावमा पनि उनी वालिङमा नगरप्रमुखको उम्मेदवार थिए । राजनीति अगाडि बढाउने क्रममा नगर कमिटीको सचिव र जिल्ला सदस्य हुने अवसर पनि उनले पाए । एमाले निकट पिपुल्स भोलेन्टियरको केन्द्रीय सदस्य भएर पनि काम गरे । राष्ट्रिय युवा संघको जिल्ला अध्यक्ष र २०७० सालमा स्याङ्जा क्षेत्र नम्बर २ बाट संविधान सभा सदस्यको उम्मेदवारको रुपमा पनि उनी अघि बढे । प्रस्तुत छ, नगरप्रमुख खाँणसँग आदर्श समाजका संवाददाता रुपनारायण ढकालले गरेको कुराकानी :
वालिङको विकासका लागि के कस्ता कामहरु अगाडि बढाउँदै हुनुहुन्छ?
गएको जेठ ६ गते हाम्रो सपथग्रहण भएको हो । असार मसान्तसम्म जो–जो प्रतिनिधि हुनुहुन्थ्यो, उहाँहरुले गरेका निर्णयहरु, उहाँहरुका कामहरुलाई कार्यान्वयन गर्ने काम हामीले गर्यौैं । साउन महिनाबाट हामीले आफ्नो तरिकाले काम सुरु ग¥यौं । यसका लागि बजेट र नीति तथा कार्यक्रम ल्याउने काममा हाम्रो ध्यान केन्द्रित भयो । फेरि के पनि भयो भने यो हाम्रो पहिलो अनुभव पनि हो । यसले गर्दा अलिकति बढी तयारी गर्नुपर्ने अवस्थाले गर्दा त्यतातिर पनि व्यस्त भइयो । देशभरि छानिएका नगरमध्ये वालिङलाई पनि स्मार्ट सिटीको रुपमा विकास गर्ने सरकारले नीति तथा कार्यक्रममा पनि समेटेको थियो । स्मार्ट सिटी भनेर त आयो तर त्यसलाई बनाउने भनेर पूर्वाधारका लागि अलग्गै बजेट विनियोजन भने गरेको अवस्था छैन । हामीलाई आशा के थियो भने स्मार्ट सिटी भनेपछि त्यसका लागि छुट्टै बजेट हुन्छ, होला । भौतिक निर्माणका कामहरु केही होलान् भन्ने आशा पनि थियो । यतातर्फ सरकारले ध्यान दिएको छैन । खालि घोषणामात्र गरिएको छ । नगरपालिकाको नाम मात्र नगरपालिका तर आयस्रोत खासै केही छैन भन्दा पनि हुन्छ । हाम्रो आन्तरिक स्रोत भनेको ५/६ करोड रुपैयाँमात्र हो । संघीय सरकारकारबाट केही रकम आउँदा लगभग २०/२२ करोड रुपैयाँ हामी परिचालन गर्छौं । पुँजीगत रुपमा सोही रकम बराबरको काम हामी गर्छौं । यत्रो नगरपालिकाको विकासका लागि यो रकमले के नै हुन्छ र? यी खालका समस्या हामीले भोगेका छौं । तर जेजस्तो अवस्था भए पनि हामीभन्दा अघिका जनप्रतिनिधिले वालिङलाई एउटा ब्रान्डको रुपमा स्थापित गर्ने काममा योगदान गर्नुभयो । बाहिरबाट हेर्दा पनि अहिले वालिङ नगरपालिका राम्रो नगरपालिका भन्ने अवस्था सिर्जना भएको छ । यो अवस्थालाई हामीले कायम राख्दै निरन्तरता दिनुपर्ने छ । अर्कोतिर जति पनि गर्नुपर्ने कामहरु छन्, नयाँ नयाँ योजनाहरु छन्, जनताको चाहनाअनुसारका कामहरु छन् तिनलाई अगाडि बढाउनुपर्ने चुनौती पनि हामीसँगै छ । खानेपानी, सिँचाइ, खेलकुद, बाटाघाटाहरु यिनै रहेछन् प्रमुख कुराहरु । यसका लागि हाम्रो योजना के छन् भने ५ वर्षको अवधिमा कम्तीमा पनि नगरपालिका र वडाहरु जोड्ने प्रमुख बाटाहरुलाई प्राथमिकता दिएर कालोपत्रे गर्ने र अन्य बाटाहरुलाई सकेसम्म पक्की नाला र ग्राभेल गर्ने योजना छ । बजेटले नभ्याए कम्तीमा अस्थायी भए पनि ग्राभेल गर्ने र नाला बनाउने योजनामा हामी छौं । वालिङभित्र पर्ने सिद्धार्थ राजमार्गको १३ किलोमिटरमा दायाँबायाँ ११ मिटर बाटो विस्तार गर्ने काम अघिल्ला जनप्रतिनिधिले जुन गरे, यसले के भयो भने अहिले तुरुन्त पिच नगर्दा गर्मीमा धुलो हुने र बर्खामा हिलो जम्ने समस्या भोग्नुपरेको छ । यसलाई पनि पहिलो प्राथमिकतामा नै राखेर अघि बढेका छौं । पहिलाबाट नै बनेका धेरै ग्रामीण सडकहरु पनि छन् र यातायातको चाप बढी भएकाले त्यता पनि ध्यान दिनुपर्ने अवस्था छ ।
फोहोर र पार्किङ व्यवस्थापनका सम्बन्धमा नगरपालिकाको योजना के छ ?
फोहोर व्यवस्थापनको जुन अवस्थामा अहिले हामी छौं, यो अवस्थामा पुर्याउन यहाँ पहिला कार्यकारी प्रमुख भएर रहनु भएका सुरत पोखरेलको भूमिका स्मरणीय छ । त्यो बेला स्थानीय निकाय राजनीतिक संयन्त्रबाट चलेका थिए । नगरपालिकाकै तत्कालीन सुब्बा पदम पाण्डे र गुमानसिं राना पनि हुनुहुन्छ । उहाँहरु मिलेर सरसफाइ यसरी गर्न सकिन्छ भनेर एउटा अवधारणा ल्याउनुभयो । त्यसपछि स्थानीय विद्यालयको जग्गा लिजमा लिएर काम सुरु गरियो । त्यसपछि बढी फोहोर निस्कने सहरी क्षेत्रमा टोल विकास समिति गठन गरियो र सचेतना फैलाउनेदेखि फोहोर संकलनको काम पनि उहाँहरुले नै गर्न थाल्नुभयो । त्यतिमात्र होइन वालिङलाई पिंक सिटीका रुपमा विकास गर्न पनि उहाँहरुको महत्वपूर्ण योगदान रहेको छ । फोहोरकै सन्दर्भमा अवधारणा उहाँहरुले ल्याउनुभयो र पछि दिदीबहिनी भन्ने संस्थालाई यसको जिम्मेवारी दिइयो । उहाँहरुले अझ उन्नत र व्यवस्थित तरिकाले फोहोर व्यवस्थापनको काम अगाडि बढाउनुभयो र पछि नगरपालिका आफैंले गर्ने भनेर फोहोर व्यवस्थापनको काम गर्दै आएका छौं । यसैगरी बसपार्कका लागि ३५ रोपनी हाराहारी जग्गा लिएर त्यसको केही भाग ग्राभेल गरेका छौं । सवारीसाधन त्यहाँ पार्किङ गर्न त लाने गरिएको छैन तर पनि हामीले त्यसलाई अगाडि बढाएका छौं । भएको सो जग्गालाई व्यवस्थित गर्ने सवालमा डिपीआर पनि तयार भइसकेको छ । अब थप निर्माणका लागि बजेट व्यवस्थापनको काम बाँकी रहेको छ ।
चालु आर्थिक वर्षको बजेटले कस्ता योजनालाई प्राथमिकतामा राखेको छ ?
आन्तरिक स्रोतका बारेमा त मैले अघि नै चर्चा गरें । प्रदेशबाट पनि आफ्नै खालका केही योजना छन् । संघमा विशेषगरी एउटा समपूरक र समानीकरण बजेटका कुराहरु हुन्छन् । सशर्त अनुदानका कुरा पनि हुन्छन् । कतिपय बजेटको कार्यविधि नै तोकेर आउने भएका कारण त्यहीअनुसारका कार्यक्रम अगाडि बढाउनुपर्ने बाध्यता हुन्छ । हाम्रो आन्तरिक स्रोत र अघि मैले भनेको २२/२३ करोड रुपैयाँको कुुरा समानीकरणभित्र पर्छ ।
देशमा संघीयता आयो, गाउँगाउँमा सिंहदरबार भन्ने कुरा पनि वास्तवमा नारामा मात्रै सीमित भएको छ । बरु मलाई के लागेको छ भने त्यतिखेर अधिकार ठ्याक्कै दिइहाल्नुभयो, तीन खालको सरकार भयो । पछिल्लो क्रममा नेतृत्वलाई पनि बढी अधिकार दिइएछ र हामी अधिकारविहीन भयौं कि भन्ने लागेर हो कि के हो, हिजो दिइएका जुन अधिकार छन् सकेसम्म हात लामो गरेर आफैं सर्वेसर्वा हुने चरित्र देखिएको छ । अहिले पनि राजनीतिक दल र कर्मचारीका माथिल्ला तहमा रहेका व्यक्तित्वहरुसम्म नपुगी र कुरा नगरी वास्तवमा बजेट ल्याउन सकिँददैन । यहाँ हामी सर्वदलीय हिसाबले अघि बढ्ने प्रयास गर्दै आएका छौं ।
वालिङको पर्यटकीय सम्भावनालाई कसरी सदुपयोग गर्दै हुनुहुन्छ?
वालिङ ११ को बाहुनथान र वडा १ मा प्याराग्लाइडिङको सम्भावना बोकेको मन्स्याङकोट पर्यटकीय दृष्टिले महत्वपूर्ण छ । प्याराग्लाइडिङको उडान भर्ने ठाउँ भीरकोटमा पर्ने भए पनि यो स्थलले हामीलाई पर्यटकीय हिसाबले सपोर्ट गरेको अवस्था छ । गह्रौंसुर मन्दिर, अकलादेवी मन्दिर र होमस्टे जस्ता आकर्षण पनि हामीसँग छन् । होमस्टेको कुरा गर्दा सुन्तलाबारी होमस्टेको बढी चर्चा हुने गरेको छ । त्यसो त वडा नम्बर १० मा पनि होमस्टेहरु रहेका छन् । र अर्को महत्वपूर्ण कुरा आँधीखोलाको राम्रो सदुपयोग गर्न सक्यौं भने हामीले एक खालको विकासको फड्को मार्न सक्ने अवस्था सिर्जना हुन्छ । गाउँतिरबाट आउने स्थायी पानी बग्ने खोलाहरुमा जलविद्युत र क्यानोनिङका कार्यक्रम अगाडि बढाउन सकिने प्रशस्त सम्भावना पनि रहेका छन् । हाम्रो ड्रिम प्रोजेक्टको रुपमा आँधीखोलामा चेकड्याम बनाएर त्यहाँ जलविहार गर्ने स्थलको रुपमा विकास गर्ने सोच हो । जम्मा भएको पानी वरपर उद्यान र रिसोर्टहरु बनाउन सकिने भयो ।
अनि वालिङसँग जोडिएको पिंक सिटीको अवधारणा कस्तो हो ?
सुरुमा यसलाई रोज सिटीको रुपमा विकास गर्ने योजना हो । अघि मैले नाम लिएँ नि उहाँहरुकै अवधारणा हो यो । खासमा गुमानसिं रानाले यसलाई अगाडि बढाउनुभएको हो । र, यसलाई अहिले पिंक सिटीको रुपमा अघि बढाउँदै आएका छौं । एकै खालको रङ घरहरुमा प्रयोग गर्ने यसको मूल अवधारणा हो । नयाँ बन्ने घरहरुले पनि यो अवधारणा पछ्याउनुभएको छ । गुलाबी रङ सौहार्दता, माया, सुन्दरता र शक्तिको प्रतीकका रूपमा पनि मानिएको छ । त्यसकारण नगरपालिकाको बजार होस् वा गाउँका घरमा एउटै रङ लगाएर समानता झल्काएर वालिङको पहिचान दिलाउने यसको अवधारणा हो । नयाँ घर निर्माण सम्पन्न भएपछि बाहिरी भित्तामा गुलाबी रङ लगाउने काममा नगरवासीको पनि साथ र सहयोग रहेको छ । बाहिर देखिने भागमा गुलाबी रङ लगाउनुपर्ने र घरभित्रको भागमा आफ्नो इच्छाअनुसारका रङ लगाउने गरिएको छ ।
उत्पादन र रोजगारी सिर्जनासम्बन्धी नगरपालिकाका योजना के हुन् ?
बेरोजगारी नेपालभरिकै साझा समस्या हो । वालिङ साँघुरो क्षेत्रफलमा भएका कारण पनि भोलि गएर ठूला खालका उद्योगधन्दा सञ्चालन गर्न सकिने अवस्था यहाँ छैन । विशेषगरी घरेलु र लघु उद्योगहरु सञ्चालन गर्ने उद्देश्य हो । सम्भावना कृषि भएकाले कृषिभित्रको पशुपालनलाई कसरी संवद्र्धन गर्न सकिन्छ भन्ने पनि हामीले सोचेका छौं । बजेट विनियोजन गरेर, किसानलाई सबलीकरण र सम्मान गर्ने किसिमले व्यवस्थित ढंगले अघि बढ्ने योजना छ । त्यसैले रोजगारीको सम्भावना बोकेको क्षेत्र वालिङमा कृषि र खासगरी पशुपालन नै हो । विदेशमा गएर कृषि गरेर आउनेले पनि यहाँ एकल वा सामूहिक रुपमा गाईभैंसी, बाख्रा पालन व्यवसाय अगाडि बढाउन सक्छन् । पछिल्लो क्रममा कालिजको कुरा पनि आएको छ । खासगरी विकास र यस्ता काममा हामी सार्वजनिक निजी साझेदारी अवधारणा अनुसार अगाडि बढ्नुपर्छ ।
संघीयता र खासगरी प्रादेशिक संरचनाप्रति विरोधका स्वरहरु पनि सुनिन थालिएको छ, यस विषयमा यहाँको मत के छ ?
यसो हेर्दा संविधानले नै तीन तहका सरकारका एकल वा सामूहिक अधिकार तोकेको छ । मलाई पनि पछिल्लो कालमा के लागेको छ भने संघ र स्थानीय सरकारलाई कति शक्तिशाली बनाउने भन्ने मुख्य कुरा हो, साधन र स्रोतको हिसाबले । जनताका लागि जतिबेला पनि पहुँचमा रहने भनेको स्थानीय सरकार नै हो । स्थानीय सरकारलाई नै बलियो बनाएर अगाडि बढ्दा प्रदेश सरकार नचाहिने हो कि भन्ने मेरो निजी धारणा हो । संघ र स्थानीय तहलाई नै व्यवस्थित र सबलीकृत बनाउने भन्ने सोच्ने हो भने प्रदेश नहुँदा पनि हुन्छ कि ! वास्तवमा जिल्ला समन्वयको कुनै भूमिका नै छैन । राज्यको तर्फबाट साधन र स्रोत तथा तलब र भत्ता त गइरहेको छ । तर त्यसको प्रतिफल त केही देखिँदैन । पछिल्लो क्रममा आएको सिनारियो हेर्दा संघ र स्थानीय जत्तिको आवश्यक प्रदेश होइन कि जस्तो देखिन्छ ।
Related News
सम्बन्धित समाचार
कतारी अमिर स्वेदश फिर्ता : पोखरा–कतार उडान माग
मानवअधिकार आयोगसमक्ष द्वन्द्वपीडित समुदायको ज्ञापन
कास्कीमा एसइई उत्तरपुस्तिका परीक्षण रोकियो
सहारा एकेडेमीमा यु–१४ फुटबल प्रशिक्षण
गण्डकीमा डायलाइसिसका लागि अब पालो कुर्न नपर्ने
hero news full width
मुख्य समाचार
स्वदेश फर्किए कतारी अमिर
कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
वैशाख १२, २०८१रोजगार खोज्दै मेलामा
वैशाख १२, २०८१कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१फेवातालमा दुर्घटनामा परेका ५ जनाको उद्धार
वैशाख ११, २०८१लोकतन्त्रका १८ वर्ष : लोकतन्त्रले छोएन लोकलाई
वैशाख ११, २०८१