पोखरा । पोखरा महानगरपालिकाले बजार अनुगमनलाई निरन्तरता दिएको छ । पोखरा महानगरपालिकाको उपभोक्ता हित संरक्षण समितिले १ सातादेखि बजार अनुगमन गरिरहेको छ । पोखराका मुख्य बजारका पसलहरुमा गरिएको अनुगमनमा महानगर उपभोक्ता हित संरक्षण समितिले नेतृत्व गरेको छ । पोखरा २६ र २७ का ५ वटा खाद्य पसलमा बुधबार अनुगमन गरेको छ । अनुगमनमा मूल्यसूची नभएको, पसल दर्ता र पसल नवीकरण नभएका तथा म्याद नाघेका खाद्य सामग्री र नापतौल दर्ता र नवीकरण नभएका फेला परेको अनुगमनमा सहभागी महानगर उपभोक्ता हित संरक्षण समितिका सदस्य सचिव भरतराज पौडेलले जानकारी दिए ।

अनुगमनमा ६ पसलका सञ्चालकलाई सम्पूर्ण कागजपत्रसहित महानगरपालिका, नापतौल तथा गुणस्तर कार्यालयमा ३ दिनभित्र उपस्थित हुन निर्देशन दिइएको पौडेलले बताए । अनुगमनमा पोखरा २६ को राखी सप्लायर्स, सेम्सा डिपार्टमेन्ट स्टोर्सबाट म्याद नाघेका वस्तु बरामद गरी नष्ट गरिएको छ । बिबिटी जनरल स्टोर्स प्रालिलाई ३ दिनभित्र नापतौल कार्यालयमा उपस्थिति हुन म्याद दिइएको छ । पोखरा २७ को थापा स्टोर्समा ढक तराजु दर्ता र नवीकरण नगरेको, झोल साबुन र रसगुल्ला म्याद नाघेको फेला परेपछि नष्ट गरिएको छ । वडा नम्बर २७ कै डागन मार्ट प्रालिले पुँजी कम राखी राजस्व छलेको पाइएको अनुगमन समितिले जनाएको छ । सोही पसलबाट म्याद नाघेको कनफेक्स बरामद गरी नष्ट गरिएको छ । अनुगमनका क्रममा पोखरा २६ का अध्यक्ष नरेन्द्र थापाले पसल सञ्चालन गर्दा दर्ता गरेर वैधानिक रुपमा सञ्चालन गर्न वडावासीसँग आग्रह गरे । अनुगमनमा जिल्ला प्रशासन कार्यालय कास्की, गुणस्तर तथा नापतौल कार्यालय, वडाका जनप्रतिनिधि र उपभोक्ता मञ्च र पत्रकारको सहभागिता थियो ।