पोखरा । दसैं अवसरमा विन्ध्यवासिनी मन्दिरमा सोमबारदेखि नवदुर्गा महोत्सव सुरु भएको छ । विन्ध्यवासिनी धार्मिक क्षेत्र विकास समितिको आयोजनामा सुरु महोत्सव महानवमीसम्म संचालन हुनेछ ।

महोत्सव शुभारम्भपछि मन्दिरवाट नवदुर्गाका ९ रुपको झाँकी, १०८ कलससहितको नवदुर्गा शोभायात्रा निकालिएको थियो ।

शोभायात्रा मोहरियाटोल, भैरवटोल, भीमसेन टोल, नालाको मुख, तेर्सापट्टी, महेन्द्रपुल, चिप्लेढुंगा, सिद्धार्थचोक, रामकृष्णटोल हुँदै पुन मन्दिरमा पुगेको थियो । शोभायात्रामा विभिन्न भजन समूह, जातीय भेषभूषा, सांस्कृतिक झाँकीहरु, नेपाली सेना, नेपाल प्रहरी, सशस्त्र प्रहरी, नेपाल स्काउट, आमा समूह तथा विभिन्न धार्मिक, सामाजिक र शैक्षिक संघसंस्थाको सहभागिता रहेको समिति अध्यक्ष समाजसेवी गणेशबहादुर श्रेष्ठले बताए ।