पोखरा। रेष्टुरेण्ट एण्ड बार एशोसिएसन नेपाल (रेवान) पोखराको आयोजनामा यही असोज ११ गते पोखराको लेकसाइडमा मिनि सडक महोत्सव २०७९ आयोजना गरिने भएको छ ।

हरेक बर्ष सेप्टेम्बर २७ तारिखमा पर्ने विश्व पर्यटन दिवसको अवसर पारेर एक दिनका लागि यो महोत्सव आयोजना गर्न लागिएको रेवान पोखराका कार्यवाहक अध्यक्ष विश्वराज पौडेलले पत्रकार सम्मेलनमा जानकारी दिए । लेकसाइडको फिस्टेल गेटदेखि वाराहीचोकसम्मको क्षेत्रमा वेलुका पाँच वजेदेखि राति १० वजेसम्म यो महोत्सव आयोजना हुने छ । आपतकालिन सवारीसाधनवाहेक अन्य सवारीसाधन संचालन नहुने गरी महोत्सव संचालन गरिने छ ।

महोत्सवमा स्वदेशी र विदेशी खानाका परिकार, विभिन्न जातजातिका सांस्कृतिक नृत्य, गन्दर्भ गायन, नेवारी लाखे नाच, पञ्चे बाजा र पर्यटन सम्बन्धि वृत्तिचित्र प्रदर्शन गरिने महोत्सवका संयोजक एवं रेवान पोखराका महासचिव विकास भट्टराईले जानकारी दिए । रिथिङ्कीङ टुरिजम अर्थात् पर्यटनलाई पुनर्विचार गर्दै भन्ने शीर्षकमा यो वर्ष पर्यटन दिवस मनाइने छ । सन् १९८० देखि संयुक्त राष्ट्र संघीय विश्व पर्यटन संगठनले यो दिवस मनाउने प्रचलनको आरम्भ गरेको हो ।

विश्व पर्यटन दिवसकै अवसर पारेर हवाई मार्ग र स्थल यातायातबाट उक्त दिन पहिलोपटक पोखरा उत्रने पर्यटकलाई सम्मान गर्ने कार्यक्रम रहेको पोखरा पर्यटन परिषद्का महासचिव सञ्जयकान्त सिग्देलले जानकारी दिए । उक्त दिन निर्माण सम्पन्न हुने चरणमा रहेको पोखरा विमानस्थलबारे छलफल कार्यक्रम समेत आयोजना गरिएको उनले सुनाए । पर्यटन क्षेत्रमा भएको लगानीको संरक्षण र नयाँ लगानीबारे कसरी अगाडि बढ्न सकिन्छ भन्ने विषयमा विचार गर्ने हिसावले पनि अहिलेको पर्यटन दिवसको नारा जोडिएको सिग्देलले बताए ।

नेपाल पर्यटन वोर्डले प्रवद्र्धन गरेको महोत्सवलाई गोर्खा व्रुअरी प्रालिले प्रायोजन गरेको छ । कार्यक्रममा रेवान पोखराका निवर्तमान अध्यक्ष लक्ष्मण वरालले पनि भनाई राखेका थिए ।