हेमजा । गौरीशंकर बहुमुखी क्याम्पसका कक्षा १२ का विद्यार्थीले शुक्रबार कक्षा ११ का नवआगन्तुक विद्यार्थीलाई स्वागत गरेका छन् । उनीहरुले खादा, डायरी र कलम प्रदान गर्दै अनुज विद्यार्थीलाई स्वागत गरे ।

कार्यक्रममा क्याम्पस प्रमुख कृष्णप्रसाद पौडेलले विद्यार्थीको शैक्षिकस्तर वृद्धिका लागि क्याम्पस सधैं तयार रहेको बताए । उनले क्याम्पस संचालन सम्बन्धमा समयसमयमा विद्यार्थीले पनि सुझाव दिनुपर्ने बताए । उनले क्याम्पसका नीतिनियमप्रति चनाखो बन्न विद्यार्थीलाई आग्रह गरे ।

सहायक क्याम्पस प्रमुख दीपक त्रिपाठीले कार्यक्रमसँगै विद्यार्थीबीच आत्मीयता बढ्ने उल्लेख गर्दै अनुशासनमा रही अध्ययनशील बन्न सुझाव दिए ।

त्यस अवसरमा विद्यार्थी एञ्जिला पुनमगर, सुवानी लिम्बु, सन्ध्या पुर्जा, ताराबहादुर गुरुङ नेतृत्वमा विद्यार्थीले विभिन्न प्रस्तुति राखेका थिए ।

कक्षा ११ का हिक्मत विक तथा मनिता सिपार्लीले स्वागत गरेकोमा खुसी व्यक्त गर्दै वार्षिकरुपमा कार्यक्रमलाई निरन्तरता दिनुपर्ने बताए । कक्षा १२ की सुस्मिता विकको अध्यक्षतामा भएको कार्यक्रममा सुशीला विकले स्वागत र सन्दिपा जिसीले संचालन गरेकी थिइन् ।