सहर छिर्नेलाई गाउँको सेवा

आदर्श समाज सम्वाददाता
असाेज १, २०७९
Ghumti Sewa Sikles

पोखरा । पोखरा–१२ माटेपानीस्थित चिउली पाचे तमु समाजघरमा सिक्लेसीको आउजाउ बढी नै हुन्छ । सिक्लेसबाट झरेर पोखरा बसेकाहरुको समाजघर भएकाले पनि उनीहरु यहाँ गइरहन्छन् । विवाह, चेलीबेटी भेटघाट, ढोगभेटलगायतमा उनीहरुको बरोबर भेट हुन्छ ।

गएको भदौ २६ देखि २९ सम्म उत्तिकै भीड दोहोरियो । तर, त्यहाँ कुनै भोज थिएन । न त भेटघाट । ३ दिनसम्म कागज बोकेर धाउनेहरु भेटिए । उनीहरु तिरो तिर्न, जन्मदर्ता, नाता प्रमाणितलगायत वडा कार्यालयबाट मिल्ने सेवा लिन समाजघर पुगेका हुन् ।

समाजघरमा पुग्नेहरु सबैको अनुहारमा कान्ति थियो । त्यही हुलमा भेटिएका शेरबहादुर गुरुङ पनि । पुरानो घर सिक्लेस बताउने उनी लामो समयदेखि पोखराको संगम टोल बस्दै आएका छन् । तर, उनको बसाइँसराइ छैन । त्यसैले सिक्लेस नै उक्लिरहन्छन् । उनले गाउँको घरको राजस्व नतिरेको लामो समय भएको थियो । पोखराबाट सिक्लेस पुग्नै ४ घण्टा बढी लाग्छ । जीप वा बसमा गए भाडामात्र १ हजार ४ सय तिर्नुपर्छ ।

सोही कारण पनि उनले लामो समयदेखि राजस्व बाँकी राखेका थिए । बुधबार समाजघर प्रांगण भेटिएका उनले राजस्व तिर्न पाए । उनले पोखरामै बसेर राजस्व तिर्न पाएकोमा खुसी लागेको प्रतिक्रिया दिए । ‘पोखराबाट जानै १४ सय लाग्छ बाटोमा खाजा खाना खानुप¥यो पैसा त कति हो कति खर्च,’ उनले भने, ‘अहिले त पोखराबाटै तिर्न पाईयो समय पनि बच्यो, पैसा पनि ।’

मादी गाउँपालिका वडा १, सिक्लेसमा रहेको वडा कार्यालयले सञ्चालन गरेको घुम्ती सेवा कार्यक्रममार्फत शेरबहादुर जस्तै धेरै सिक्लेसीहरुले सुविधा पाएका छन् । आधा सिक्लेसीहरु पोखरा बस्ने भएकाले वडाबाट निर्णय गरेरै घुम्ती सेवा कार्यक्रम गरिएको वडाध्यक्ष देवीजंग गुरुङले जानकारी दिए । आफ्नो चुनावी नारामा समेटिएको घुम्ती सेवालाई पदभार ग्रहण गरेकै दिन निर्णय गरेर सुरु गरेको उनको भनाइ थियो । हरेक २ महिना अन्तरालमा घुम्ती सेवा दिने निर्णय भएको हो । सोहीअनुसार पहिलो चरणमा असार ३० र ३१ गते सेवा सञ्चालन गरे । त्यो बेला सेवाग्राहीको चाप बढेपछि साउन १ र २ मा सेवा थप गरियो ।

दोस्रो चरणअन्तर्गत भदौ २६ देखि २८ सम्म निर्धारण गरिएकोमा १ दिन लम्बियो । सिक्लेस भौगोलिक हिसाबले मादी गाउँपालिकाकै ठूलो अनि विकट गाउँ भएकाले पनि आफूहरुले घुम्ती सेवा सुरु गरेको वडाध्यक्ष गुरुङले जानकारी दिए । यस कार्यक्रमबाट दैनिक ३० देखि ४० जनाले सेवा लिने गरेका छन् । आगामी दिनमा पनि यसलाई अझै प्रभावकारी रुपमा अघि बढाउने योजना रहेको उनले सुनाए ।

सिक्लेसजस्तै ताङतिङ गाउँ पनि विकट अनि भौगोलिक रुपमा टाढा छ । पोखरादेखि २० किमी परको ताङतिङका पनि आधा जति जनता पोखरा बस्छन् । विभिन्न कारणले सहर बसेकाहरु वडाको काम परे २ घण्टाको यात्रा ३ सय भाडा तिरेर गाउँ उक्लनुपर्ने बाध्यतामा छन् । मादी २ ले पनि पोखरा बस्ने जनताको सुविधाका लागि पोखरा १२ स्थित दुधपोखरी तमु समाजघरमा घुम्ती सेवा कार्यक्रम गरेको थियो ।

ताङतिङ र आसपासका गाउँका स्थानीयलाई समेट्ने गरी सञ्चालन गरिएको मादी २ को घुम्ती कार्यक्रम ३ दिनसम्म चलेको थियो । मादी २, वडा कार्यालयले हरेक महिना २ देखि ३ दिन पोखरामा घुम्ती सेवा दिने भएको छ ।

घुम्ती सेवाबाट दैनिक ५० जना सेवाग्राहीलाई सेवा दिएको वडासचिव वसन्त थापा मगरले बताए । जहाँबाट सेवा दिए पनि प्रशासनिक काममा कुनै भिन्नता नरहे बताउँदै उनले पोखरा आएर सेवा दिंदा सेवाग्राही निकै खुसी हुने गरेको जनाए ।

वडाका सम्पूर्ण सेवा पोखराको घुम्ती सेवामा दिने गरिएको उनको भनाइ थियो ।

Related News

सम्बन्धित समाचार

  • प्रमुखज्यूसँग भेटघाट : समस्या सुनाउँदै, आशावादी बन्दै

    धनबहादुर गुरुङ असाेज १०, २०७९
    पोखरा । पोखरा १५ की देवकी विक प्रसन्न मुद्रामा न्युरोडस्थित पोखरा महानगरपालिका कार्यालयको प्रांगणमा भेटिइन् । मेयर धनराज आचार्यलाई आफ्नो…
  • कर फिर्ताको निर्णयमा गण्डकी कांग्रेसको स्वागत

    आदर्श समाज सम्वाददाता असाेज ९, २०७९
    पोखरा । नागरिकको मागलाई सम्बोधन गर्दै गण्डकी प्रदेश सरकारले करका दर समायोजन गरेकामा नेपाली कांग्रेस गण्डकीले स्वागत गरेको छ ।…
  • गण्डकी सरकारले घटायो करका दर, २ अध्यादेश पारित

    आदर्श समाज सम्वाददाता असाेज ८, २०७९
    पाेखरा । गण्डकी प्रदेश सरकारले नागरिकको आवाज सम्बोधन गर्दै करका दरमा पुनावलोकन गर्ने लगायत ३ महत्वपूर्ण निर्णय गरेको छ । असोज…
  • नागरिकताका लागि संघर्ष

    धनबहादुर गुरुङ असाेज ८, २०७९
    पोखरा । नेपालका यौनिक तथा लैंगिक अल्पसंख्यक समुदाय (पारलैंगिक) मध्ये ‘अन्य’ लैंगिक पहिचानबाट १ सय ८३ जनाले नागरिकता लिइसकेका छन्…
  • पहिलोपल्ट पम्प सिस्टममा बिजुली

    आदर्श समाज सम्वाददाता असाेज ७, २०७९
    पोखरा । नेपालमै पहिलो पटक पम्पिङ प्रणालीबाट विद्युत उत्पादन पोखरामा गरिने भएको छ । पम्पबाट पानी तानेर इन्टेकमा स्टोर गर्ने…

hero news full width