पोखरा । कास्कीको माछापुच्छ्रे गाउँपालिका ६, धितालका राजाराम पौडेलले आफ्नो पालिकामा एक्याप र स्थानीय सरकार समानान्तर चल्दा नागरिकले सास्ती भोग्नुपरेको गुनासो गरे । ‘एक्याप र स्थानीय सरकार समानान्तर भयो । पालिकाको क्षेत्रभित्र एक्याप छ तर पालिकालाई टेर्दैन,’ उनले भने, ‘पालिका र एक्याप समानान्तर हुँदा जनताले दुख पाएका छन् । समाधानको निकास खोजियोस् ।’
उनीमात्रै होइन, जनप्रतिनिधि पनि एक्यापको कामप्रति सन्तुष्ट छैनन् । माछापुच्छ्रे गाउँपालिका वडा २ का अध्यक्ष गणेश आचार्य एक्यापले निर्दोषलाई अपराधी करार गरेको आरोप लगाउँछन् । ‘जसले मसिन चलाएकै छैन, उसलाई एक्यापले पत्र लेखेको छ,’ उनले भने, ‘कसैले उजुरी गर्यो भन्दैमा निर्दोषलाई पत्र लेख्नुपर्छ ? उसको सामाजिक प्रतिष्ठा बिग्रिएको छ, त्यसको जिम्मा कसले लिन्छ ?’
उनले आफूहरु पनि संघ सरकारकै कानुनअनुसार संचालित सरकार भएकोले एक्यापलाई समन्वयबिना अघि नबढ्न चेतावनी दिए । ‘संघको कानुनअनुसार चलेको भनेर अवैध काम गर्न मिल्छ ? दर्ता नभएको संस्थाले के आधारमा शुल्क उठाएको छ ? सिएमसीको अहिलेसम्म अधिवेशन भएको छैन,’ आचार्य भन्छन्, ‘एक्यापले सरासर गल्ती गरिरहेको छ ।’ माछापुच्छ्रे ८ का वडाध्यक्ष रामबहादुर गुरुङ एक्यापकै कारण आन्तरिक स्रोत बढाउन नसकेको गुनासो गर्छन् । ‘सरकार भनेको त आफैं स्रोत खोजेर विकास गर्ने हो नि ! हाम्रो स्रोतजति एक्यापले हडपेको छ,’ उनले भने, ‘न खोला छुन पाएका छौं, न जंगल छिर्न । सानो दाउरा काट्दासमेत मुद्दा खेप्नुपर्छ । सरकार आए पनि नागरिकले अनुभूति गर्न पाएका छैनन् ।’ एक्यापले पालिकासँग समन्वय नगरेको आरोप उनले लगाए ।
एक्याप प्रतिनिधि बाबुलाल तिरुवाले आफूहरु सरकारकै मातहतमा रहेर चलेको बताए । ‘नागरिकलाई दुख दिने हाम्रो नियत छैन । सकेसम्म समन्वय गरेरै चलेका छौं,’ उनले भने, ‘अहिले हामी संघ सरकारको एउटा अंगको रुपमा छौं । संरक्षणको काम गरेका छौं । भोलि सरकारले हटायो भने हामी प्राविधिकरुपमा मात्रै काम गर्छौं । यो हाम्रो रहर होइन ।’ उनले हाल अन्योल रहेकोले केही समयमै एक्यापबारे टुंगो लाग्ने र त्यसबेलासम्म विद्यमान व्यवस्थाअनुसार नै चल्ने स्पष्ट पारे ।
गाउँपालिका अध्यक्ष मीनबहादुर गुरुङले एक्यापसँग धेरै पटक समन्वय गर्न खोज्दा सफल नभएको बताए । ‘नागरिकको गुनासो बढेको छ । सरकार भएपछि हामीले उनीहरुको कुरा सुन्नुपर्छ,’ गुरुङ भन्छन्, ‘एक्याप अव स्थानीय सरकारमा आउनुपर्छ ।’ खासगरी एक्यापका कारण नदीजन्य सामग्री उत्खनन् गर्न नपाएको पालिकावासीको गुनासो छ । एक्याप डेढ वर्षदेखि बिनानवीकरण चलिरहेको छ । २०७७ माघमा म्याद सकिएपछि नवीकरण भएको छैन ।
संघ सरकारकै कानुनअनुसार संचालित सरकार भएकोले एक्यापलाई समन्वयबिना अघि नबढ्न चेतावनी
गाउँपालिकाले नागरिकलाई प्रदान गरेको सेवा प्रवाह र विकास निर्माणका विषयमा आयोजना गरिएको सार्वजनिक सुनुवाइमा सहभागीले पोखरा खानेपानी संस्थानबाट पालिकाले राजस्व लिनुपर्ने बताएका छन् । ‘मर्दीखोलाको पानी पोखरा पुगेको छ । ड्यामका कारण खेतीयोग्य जमिन कटान भएको छ, सिंचाइ नभएर बाँझिएको छ,’ स्थानीय नन्दलाल गौतमले भने, ‘हाम्रो जमिनको सुरक्षा हुनुप¥यो । पालिकाले संस्थानबाट राजस्व लिनुपर्छ । त्यसका लागि पहलहोस् ।’ अध्यक्ष गुरुङले राजस्व लिनकै लागि कार्यपालिकाबाट निर्णय भएर सम्बन्धित निकायमा पठाइएको जानकारी दिए ।
उनीहरुले भेडाबारीमा निर्माण हुने भनिएको एन्फाको ड्रिम प्रोजेक्ट अन्योलमा परेकोप्रति गुनासो गरेका छन् । ‘एन्फाको एकेडेमी बनाउने भनेर हामीले जग्गा दियौं । पहिले १७ करोड छुट्टिएको सुनेका थियौं । अहिले के प्रगति भइरहेको छ?,’ एकनारायण अधिकारीले भने, ‘पालिकाको बजेट पनि खर्च भएको छ । राष्ट्रकै गौरवको योजना अलपत्र पर्दा हाम्रो मन दुखेको छ । योजना जसरी पनि पूरा होस् ।’
कार्यक्रमका सहभागीले पालिकाका विभिन्न सडक निर्माणमा ढिलासुस्ती भएको, १५ शैय्याको अस्पताल निर्माणका लागि जग्गा टुंगो नलागेको, अबैधरुपमा क्रसर संचालन र नदीजन्य सामग्री निकासी भएको, करारका कर्मचारी हटाएको, बजेट विनियोजनमा विभेद गरेको गुनासो गरे ।
गाउँपालिका उपाध्यक्ष सीता अधिकारीले नागरिकको आवश्यकता र अपेक्षाकै आधारमा योजना छनोट र बजेट विनियोजन गरेको बताएकी छिन् । उनले अस्पताल निर्माणका लागि जग्गा केही महिनाभित्रै टुंगो लगाउने र निर्माण सुरु गर्ने बताइन् । करारका कर्मचारीको म्याद सकिएर सम्झौता नवीकरण नभएको, सडक निर्माणमा ठेकेदारले बदमासी गरेकाले समयमा सम्पन्न हुन नसकेको अधिकारीको भनाइ छ । कार्यक्रममा प्रमुख प्रशासकीय अधिकृत वेदहरि अधिकारीले गत वर्ष सम्पन्न योजना र बजेट खर्चबारे जानकारी दिएका थिए ।
Related News
सम्बन्धित समाचार
१३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
कतारी अमिर स्वेदश फिर्ता : पोखरा–कतार उडान माग
मानवअधिकार आयोगसमक्ष द्वन्द्वपीडित समुदायको ज्ञापन
कास्कीमा एसइई उत्तरपुस्तिका परीक्षण रोकियो
सहारा एकेडेमीमा यु–१४ फुटबल प्रशिक्षण
hero news full width
मुख्य समाचार
गण्डकीमा डायलाइसिसका लागि अब पालो कुर्न नपर्ने
स्वदेश फर्किए कतारी अमिर
वैशाख १२, २०८१कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
वैशाख १२, २०८१रोजगार खोज्दै मेलामा
वैशाख १२, २०८१कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१फेवातालमा दुर्घटनामा परेका ५ जनाको उद्धार
वैशाख ११, २०८१