गैंडाकोट । गैंडाकोटमा शुक्रबारदेखि प्रथम गैंडाकोट मदन भण्डारी स्मृति कप फुटबल प्रतियोगिता सुरु भएको छ । मदन भण्डारी स्पोर्टस् एकेडेमी गैंडाकोटले आयोजना गरेको प्रतियोगिताको नगरप्रमुख मदनभक्त अधिकारीले खेलाडीलाई फुटबल हस्तान्तरण गरी उद्घाटन गरे ।

‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ मदन भण्डारी सेभेन ए साइड नक आउट फुटबल प्रतियोगितामा ३५ टिमले प्रतिस्पर्धा गर्ने आयोजक संस्थाका सल्लाहकार सदस्य नवराज कँडेलले जानकारी दिए ।

यो गैंडाकोटकै सबैभन्दा ठूलो पुरस्कार राशि भएको फुटबल प्रतियोगिता हो । जसको प्रथम पुरस्कार ट्रफीसहित १ लाख ११ हजार १ सय ११ र द्वितीय पुरस्कारमा ट्रफीसहित ५५ हजार ५ सय ५५ रुपैयाँ रहेको मदन भण्डारी स्पोर्टस् एकेडेमीका अध्यक्ष नरेश थापाले बताए । गैंडाकोट ६ मा रहेको भाग्योदय आधारभूत विद्यालय नजिकको खेलमैदानमा भएको प्रतियोगिता शुक्रबारदेखि एक हप्तासम्म चल्ने छ ।

प्रतियोगितामा नवलपुर, चितवन, तनहुँ, नवलपरासी र मकवानपुरका फुटबल क्लबहरुले प्रतिस्पर्धा गर्दै छन् ।

प्रतियोगिताको उद्घाटन गर्दै नगरप्रमुख मदनभक्त अधिकारीले स्व. मदन भण्डारी राष्ट्रकै सम्पत्ति भएकाले उनकै स्मृतिमा फुटबल प्रतियोगिता आयोजना गर्नु सराहनीय भएको बताए । समारोहमा जिल्ला खेलकुद महासंघ नवलपुरका अध्यक्ष सेतमान पुनले खेलहरुमध्ये फुटबल संसारकै लोकप्रिय खेल भएकाले बलियो हुन र स्वस्थ्य हुन पनि खेल आवश्यक भएको बताए ।