पाेखरा विमानस्थल छिटाे सञ्चालन गर्न माग

आदर्श समाज सम्वाददाता
भाद्र २४, २०७९
HAPN 2

पोखरा।  निर्माण अन्तिम चरणमा पुगेको पोखरा अन्तर्राष्ट्रिय विमानस्थल तोकिएकै मितिमा संचालनका लागि आवश्यक तयारी तीव्र पार्न सरोकारवालाले जोड दिएका छन् । होटल संघ पोखरा नेपालको ४१ औं वार्षिक साधारणसभा अवसरमा वक्ताले विमानस्थल संचालनमा ल्याउनेक्रममा पहिलो उडान अन्तर्राष्ट्रिय प्रकृतिको नै हुनुपर्ने माग गरे ।

संघ अध्यक्ष लक्ष्मण सुवेदीले विमानस्थलको निर्माण कार्य अनसन नै बसेर सुरुआत गराउनुपरेको स्मरण गर्दै नयाँ विमानस्थललाई घरेलु विमानस्थलका रुपमा अगाडि बढाउने चलखेल हुन सक्ने भन्दै त्यसविरुद्ध प्रदेशवासी एक हुनुपर्ने बताए ।

पोखरा पर्यटन परिषद् अध्यक्ष पोमनारायण श्रेष्ठले विमानस्थल संचालनमा ल्याउनुपूर्व गर्नुपर्ने रिठ्ठेपानी डाँडाको कटान र ल्यान्डफिल साइट स्थानान्तरण समयमै हुनुपर्नेमा जोड दिए । उनले डाँडो कटान सक्न ६ महिना लाग्ने कुरासमेत उठेको भन्दै यसले विमानस्थलको संचालनपछि धकेल्न सक्नेतर्फ ध्यानाकर्षण गराए ।

यसअघि पोखरा महानगर प्रमुख धनराज आचार्यले कार्यक्रम उद्घाटन गर्दै पोखरालाई पर्यटकीय राजधानी घोषणा गर्ने सवालदेखि विमानस्थल संचालनसम्मका कामप्रति आफू सचेत रहेको बताए ।

‘पोखरा अन्तर्राष्ट्रिय विमानस्थल संचालन ः पोखरा र गण्डकी प्रदेशको पर्यटन’ उद्घोषसहित संघले आयोजना गरेको साधारणसभामा हान केन्द्रीय अध्यक्ष सिर्जना राणाले पोखरालाई पर्यटकीय राजधानी घोषणा गर्ने सवालमा केन्द्रीय हानको पूणर् सहयोग रहने भनाइ राखिन् । अब सरकारको मात्र मुख ताकेर बस्ने अवस्था नभएको भन्दै उनले प्रवद्र्धन लगायतका काममा व्यवसायी आफैं अगाडि बढ्नुपर्ने बेला आएको बताइन् । पर्यटक आगमन दरको अवस्था हेर्दा अहिले पनि नेपालको पर्यटन जटिल अवस्थामा रहेको पुष्टी हुने उनले सुनाइन् । जसअनुसार अहिले डिजिटल र आधुनिक मार्केटिङमा जोड दिनुपर्ने अवस्था आएको बताउँदै उनले कुन प्रकारका पर्यटक हामीले भित्र्याउन खोजेको हो त्यसमा प्रष्ट हुनुपर्ने भनाइ राखिन् । सरकारले पर्यटन क्षेत्रलाई पनि उद्योगको मान्यता दिनुपर्ने माग राख्दै उनले चालू बजेटमा पर्यटनका लागि विगतमा जस्तो राहतका कार्यक्रम नसमेटिनु आश्चर्यलाग्दो भएको बताइन् ।

हानका केन्द्रीय सदस्य एवं होटल संघ पोखरा नेपालका सल्लाहकार भरतराज पराजुलीले पृथ्वी राजमार्गको मुग्लिन पोखरा खण्ड र महेन्द्र राजमार्गको बुटवल नारायणगढ खण्डमा सडकको स्तरोन्नति अति सुस्त गतिमा हुँदा पर्यटनलाई असर परेको बताए ।

होटल संघ नेपाल गण्डकी अध्यक्ष हरिप्रसाद शर्मा गैह्रेले कोभिडपछि पनि सरकारले चर्को कर असुल्न नछाडेको भन्दै पर्यटन क्षेत्रमा मजदूरका लागि व्यवस्था गरिएको १० प्रतिशत सेवा शुल्क २/३ वर्ष स्थगित गर्न सके कोभिडले थला परेको पर्यटन क्षेत्र अघि बढ्न सहज हुने भनाई राखे । उनले घण्टा प्रणालीको आधारमा मजदुरलाई काम लगाउने व्यवस्था पनि सुरु गर्नुपर्ने वेला आएको बताए । सो अवसरमा संघका महासचिव राजेन्द्र ढकालले संघले १ वर्षमा गरेका र आगामी कार्यक्रमबारे अवगत गराएका थिए ।

वक्ताले कोभिडपछि पर्यटन क्षेत्र विस्तारै लयमा फर्के पनि सरकारले गत वर्षजस्तो राहातका कार्यक्रम नल्याएको गुनासो गरेका थिए । कोभिडका बाबजुद होटल क्षेत्र हतोत्साही नभएको होटल संघ पोखरा नेपालका अध्यक्ष सुवेदीले भनाई राखेका थिए । कोभिडका कारण धेरै मजदूर र व्यवसायी पलायन भएको स्मरण गराउँदै उनले व्यवसायीका समस्या बुझ्ने र सोही अनुसारको कानुन बनाउने सरकार जरुरी भएको भनाइ राखे । नेपाल पत्रकार महासंघ गण्डकी महासचिव गोविन्द सुवेदी र होटल संघ पोखरा नेपालका प्रथम उपाध्यक्ष दीपक श्रेष्ठले पनि कार्यक्रममा भनाइ राखेका थिए ।

Related News

सम्बन्धित समाचार

  • पर्यटन दिवसमा लेकसाइडमा मिनी सडक महोत्सव

    आदर्श समाज सम्वाददाता असाेज ९, २०७९
    पोखरा। रेष्टुरेण्ट एण्ड बार एशोसिएसन नेपाल (रेवान) पोखराको आयोजनामा यही असोज ११ गते पोखराको लेकसाइडमा मिनि सडक महोत्सव २०७९ आयोजना…
  • पर्यटन व्यवस्थापन समिति घान्द्रुकमा विक्रम

    आदर्श समाज सम्वाददाता असाेज ६, २०७९
    पोखा । पर्यटन व्यवस्थापन समिति घान्द्रुकको प्रथम अधिवेशनले विक्रम गुरुङको अध्यक्षतामा १५ सदस्यीय कार्यसमिति सर्वसम्मत चयन गरेको छ । कार्यसमिति…
  • ओझेलिएको मनोरम मुठाचौर   

    आदर्श समाज सम्वाददाता भाद्र २५, २०७९
    बागलुङ । पहाडको टुप्पोमा छ मुठाचौर । यहाँभन्दा माथि कुनै बस्ती छैन । तमानखोला गाउँपालिका–२ मा पर्ने मुठाचौर बागलुङ जिल्लाकै…
  • पोखरा पर्यटन परिषद् अध्यक्षमा पोमनारायण

    आदर्श समाज सम्वाददाता भाद्र १०, २०७९
    पोखरा । पोखरा पर्यटन परिषद् अध्यक्षमा पोमनारायण श्रेष्ठ निर्वाचित भएका छन् । संस्थाको बिहीबार २२ औं वार्षिक साधारण सभा तथा…
  • ‘पर्यटन क्षेत्रमा दक्ष जनशक्तिको खाँचो’

    आदर्श समाज सम्वाददाता भाद्र ९, २०७९
    पोखरा । पोखराको पर्यटन क्षेत्रमा दक्ष जनशक्तिको खाँचो रहेको एक कार्यक्रमका वक्ताहरुले औंल्याएका छन् । दक्ष युवाशक्ति विदेश पलायन हुने…

hero news full width