पोखरा । रेडियो सराङकोट पोखराले मिडिया फुटसल प्रतियोगिता आयोजना गर्ने भएको छ । रेडियोको १६ औं वार्षिकोत्सव अवसरमा आगामी असोज ७ र ८ गते अन्तरमिडिया फुटसल प्रतियोगिता हुने भएको हो ।

पोखरामा बिहीबार पत्रकार सम्मेलनमा रेडियोका कार्यकारी निर्देशक कृष्णबहादुर थापाले वार्षिकोत्सव समारोह भव्य बनाउन मिडिया फुटसल प्रतियोगिता गर्न लागेको जानकारी दिए । करिब २५ टिमले भाग लिने अनुमान गरिएको प्रतियोगिता विजेताले ४० हजार र उपविजेताले २५ हजार साथमा ट्रफी र प्रमाणपत्र प्राप्त गर्ने छन् । विधागत पुरस्कार समेत व्यवस्था छ ।

प्रतियोगिता संयोजक युवराज भण्डारीले प्रतियोगितामा भाग लिने खेलाडी विशुद्ध पत्रकार तथा संचारकर्मी हुनुपर्ने बताए । उनले गैरपत्रकार एवं संचारकर्मीलाई प्रवेशमा कडाइ गर्न कुनै कसर बाँकी नराख्ने बताए । त्यसका लागि सरोकारवालासँग बसेर थप प्रावधान बनाइने उनको भनाइ छ ।

यस्तै, रेडियोले वार्षिकोत्सव अवसरमा यही भदौ ७ मा महिला संचारकर्मीबीच तीज विशेष कार्यक्रम समेत गर्ने जनाएको छ ।

‘एकताबद्ध सहकार्य, आर्थिक उन्नतिका लागि सहकारी’ मूल मन्त्रका स्थानीय समुदायको पहलमा २०६३ सालको असोजमा सराङकोट बहुउद्देश्यीय सहकारी संस्था स्थापित भएको हो । सोही सहकारीद्वारा रेडियो सराङकोट संचालन भइरहेको स्टेसन म्यानेजर योगेन्द्र श्रेष्ठले जानकारी दिए ।

पत्रकार सम्मेलनमा अध्यक्षको आसनबाट प्रबन्ध निर्देशक अर्जुनबहादुर बस्नेतले सो अवसरमा सम्मान, प्रोत्साहन कार्यक्रम, रक्तदान एवं सरसफाइ कार्यक्रम समेत हुने जानकारी दिए । कार्यक्रममा स्वागत रेडियोका निर्देशक रमेशबहादुर थापा र संचालन स्टेशन म्यानेजर योगेन्द्र श्रेष्ठले गरेका थिए । पोखराको न्युरोडिस्थित रेडियो सराङकोटले समयसमयमा सामाजिक उत्तरदायित्वका कार्यक्रम संचालन गर्दै आएको छ ।