स्याङ्जा । सहयात्री को–अपरेटिभ लिमिटेड, स्याङ्जाको ११ औं वार्षिकोत्सव अवसरमा सपिङ ब्याग वितरण गरिएको छ ।

‘सफा पुतलीबजार राख्न, हाम्रो सानो प्रयत्न’ भन्ने नाराअंकित सो ब्याग सहकारी अध्यक्ष अज्योद्धा शाक्यले पुतलीबजार नगर प्रमुख तुलसीराम रेग्मीलाई हस्तान्तरण गरी वितरण आरम्भ गरिएको हो ।

कार्यक्रममा नगरप्रमुख रेग्मीले सहयात्रीले स्थापनाकालदेखि गर्दै आएको रचनात्मक कार्यको प्रशंसा गर्दै नगरपालिकाको सोैन्दर्यता बढाउनका लागि गरेको पहललाई धन्यवाद दिए । प्लाष्टिकमुक्त नगर बनाउने अभियानलाई सहयोग गर्न नगरवासी र सहयात्रीसँग सहकार्य गर्दे सफा पुतलीबजार निर्माणका लागि अघि बढ्ने उनले बताए ।

कार्यक्रममा वडा अध्यक्ष राजेन्द्रप्रसाद श्रेष्ठ, सब इन्जिनियर अरुण पौडेल, वातावरण तथा सरसफाइ शाखा प्रमुख धनप्रसाद कोइराला, सहकारी शाखा प्रमुख विष्णु ढकाल, प्रेम थापा लगायतले स्वच्छ र सफा पुतलीबजार निर्माणका लागि सहयोग गर्ने प्रतिबद्धता जनाए ।

नगरपालिकाले नगरभित्रका १२ हजार घरधुरीमा र सहकारीले ५ हजार घरधुरीमा यस्ता झोला वितरण गर्ने लक्ष्य राखेको संस्थाका कोषाध्यक्ष श्रीबहादुर गुरुङले बताए ।

२०६९ सालमा स्थापित सहकारीमा २०२० सेयर सदस्य छन् भने सहकारीले विभिन्न समयमा मानवीय, आर्थिक तथा जिन्सी सहयोग गर्दै आएको छ ।

सहकारीले यसअघि पनि दृष्टिविहीनका लागि सेतो छडी, चम्पागिरि आश्रममा आर्थिक सहयोग, जिल्ला अस्पताल स्याङ्जामा फलफूल र पानीका जार वितरण र दिशानिर्देश बोर्ड सहयोग गरेको थियो ।

सहकारीले २०७२ सालको भूकम्पमा गोरखाको बारपाक लगायत पुतलीबजारका विभिन्न वडामा भूकम्प पीडितका लागि कपडा, खाद्यान्न, जस्तापाता सहयोग, रामनदी वृद्धाश्रममा आर्थिक तथा खाद्यान्न सहयोग, अमोर सेवा नेपाल (बालगृहमा) खाद्यान्न सहयोग, बाल बचतकर्ताका लागि निःशुल्क झोला वितरण, निशुल्क दन्त तथा स्वास्थ्य शिविर, कोभिड १९ पहिलो संक्रमणको बेलामा पुतलीबजार नगरपालिकामार्फत खाद्यन्न वितरण, कोभिड–१९ दोस्रो संक्रमणमा सर्वसाधारणमा निशुल्क मास्क वितरण लगायत सामाजिक उत्तरदायित्वअन्र्तगत काम पनि गरेको छ ।