पोखरा । जिल्ला प्रहरी कार्यालय कास्की परिसरमा निर्मित पुस्तकालयलाई लायन्स क्लब अफ पोखरा अभियानले विभिन्न पुस्तक हस्तान्तरण गरेको छ ।

क्लब अध्यक्ष कृष्ण लम्सालले उक्त पुस्तकहरु प्रहरी नायव उपरीक्षक सुन्दर तिवारीलाई हस्तान्तरण गरेका हुन् । लम्सालले प्रहरी परिसरमा पुस्तकालय निर्माण हुनु अति सह्रानीय कार्य भएको जनाउँदै प्रसिद्ध लेखकका उपयोगी, प्रेरणादायी, ज्ञानवद्र्धक पुस्तक भएकाले पुस्तक अध्ययनमा रुचि हुने विशवास व्यक्त गरे ।

कार्यक्रममा डिष्ट्रिक ३२५ आइ नेपालका द्वितीय भाइस डिष्ट्रिक गभर्नर विनोद ढुंगानाले सही ज्ञानले मानिसको जीवनमा सकारात्मक परिवर्तन ल्याउन सम्भव हुने जनाउँदै पुस्तकालयमा रहेका पुस्तकबाट प्रहरी, सेवाग्राही, थुनुवाहरु सबै लाभान्वित हुने बताए । उनले लायन्स क्लबले समाजसेवाको क्षेत्रमा उल्लेखनीय योगदान गरेको स्मरण गर्दै सामाजिक उत्तरदायित्वअन्तर्गत विभिन्न कार्यहरु गर्दैै आएको बताए । आगामी दिनमा पुस्तकालयलाई प्रविधियुक्त बनाउन र इलाइब्रेरीका लागि आवश्यक सहयोगका लागि हातेमालो गर्न तयार रहेको उनको भनाइ छ ।

डिएसपी सुन्दर तिवारीले सहयोगप्रति आभार व्यक्त गरे । उनले नागरिक बर्दी विनाका प्रहरी भएकाले समाजमा अपराध न्युनीकरण, शान्ति, अमनचयन स्थापना गर्न सकारात्मक साथको खाँचो आंैल्याए । उनले प्रहरीभित्र पनि ज्ञानको दायरालाई फराकिलो बनाउनका साथै उनीहरुको रुचि अनुसारका प्रेरणादायी पुस्तक अध्ययनको वातावरण लागि पुस्तकालय निकै उपयोगी भएको र आगामी दिनमा प्रविधिमैत्री पुस्तकालय बनाउने तयारीमा रहेको जनाए । तत्कालीन कास्की प्रहरी प्रमुख प्रहरी उपरीक्षक रमेश थापाको नेतृत्वमा निर्मित सो पुस्तकालय असारको १३ मा उद्घाटन गरिएको थियो ।