पोखरा । रोटरी क्लब अफ पोखरा मिडटाउनले रामबजारस्थित एसओएस हर्मन माइनर स्कुलमा वृक्षरोपण गरेको छ । इनरह्वील क्लब अफ पोखरा मिडटाउ र रोक्ट्रयाक क्लबको संयुक्त आयोजनामा स्कुल हाताभित्र फलफूलका बिरूवा रोपिएका हो ।

डिभिजन वन कार्यालय कास्कीका प्रमुख केदार बरालले फलफूलका बिरूवा बालग्रामका आमाहरूलाई हस्तान्तण गरी कार्यक्रमको शुभारम्भ गरेका थिए । उनले रोटरी क्लबले बालग्राममा फलफूलका बिरूवा रोपी पुण्य काम गरेको बताए । बरालले आगामी वर्ष गरिने वृक्षरोपणका लागि वन कार्यालयले आवश्यक बिरूवा उपलब्ध गराउने प्रतिबद्वता जनाए ।

रोटरी क्लब अफ पोखरा मिडटाउनका अध्यक्ष रवीन्द्रनाथ बास्तोलाको अध्यक्षतामा भएको कार्यक्रममा क्लबका पूर्व अध्यक्ष सन्तोष पोखरेल, सचिव विकास अधिकारी, एसओएस बालग्रामका निर्देशक भगतकुमार श्रेष्ठ, उपनिर्देशक बाबुराम बराल लगायतले बोलेका थिए ।

क्लबले यस वर्ष बालग्रामका बालबालिका लक्षित आँप, लिची, एभोकाडो, जापानिज कटुस, कफी लगायत बिरुवा रोपेको कार्यक्रम संयोजक उपेन्द्र पौडेलले बताए ।