निरन्तर वर्षाले जनजीवन अस्तव्यस्त

आदर्श समाज सम्वाददाता
श्रावण १८, २०७९
20200723102328_IMG_1298

पोखरा । केही दिनयता परेको निरन्तर वर्षाले ठाउँठाउँको जनजीवन अस्तव्यस्त बनेको छ । कतै सडक अबरुद्ध हुँदा आवतजावत हुन सकेको छैन भने कतै डुबानले मानिस त्रसित छन् ।

पोखरा १३, कमलपोखरीमा आइतबार राति परेको भारी वर्षाका कारण त्यहाँ जलमग्न भएको थियो । त्यहाँका करिब १ सय ५० घर डुबानमा परेका थिए ।

यस्तै, वर्षाका कारण गएको पहिरोमा कास्कीका ग्रामीण तथा छिमेकी जिल्ला जोड्ने सडक अवरुद्ध भएका छन् । जिल्ला प्रहरी कार्यालय कास्कीका अनुसार सोमबार साँझ ६ बजेदेखि पोखराको बेगनास हुँदै लमजुङको भोर्लेटार जोड्ने पक्की कालोपत्र सडक पूर्णरूपमा अवरुद्ध भएको छ । रुपा गाउँपालिका–१ स्थित गैरीपोखरीमा २५ मिटर जति सडक डेढ फिट तल भासिएको जिल्ला प्रहरी कार्यालयका प्रवक्ता एवं प्रहरी नायब उपरीक्षक सुन्दर तिवारीले जानकारी दिए । उनका अनुसार सो सडकमा अहिले पूर्णरूपमा सवारीसाधन सञ्चालन रोकिएको छ ।

अन्नपूर्ण गाउँपालिका–७ वीरेठाटी स्थितमा नयाँपुल–घान्द्रुक–उल्लेरी जाने पक्की बाटो पहिरोका कारण अवरुद्ध भएको छ । वीरेठाटी सामुदायिक वनको पाखाको अन्दाजी २५ मिटर माथिबाट सोमबार साँझ पहिरो आई बाटो बन्द भएको बताइन्छ । पर्यटकीय गन्तव्य घान्द्रुक जाने एकमात्र सडक पहिराले अवरुद्ध भएपछि आन्तरिक तथा बाह्य पर्यटकसमेत प्रभावित बनेका छन् । सोमबार रातिदेखि पोखरा–२९ घोतघोतेस्थित पृथ्वीराजमार्गमा वर्षाको कारण नहरको पानी ओभरफ्लो हुँदा राजमार्ग केही समय अवरुद्ध भएको छ । पानी सडकमा जाँदा सवारीसाधन फस्ने, दुर्घटना हुने जोखिम भएका कारण पावरहाउस र ताल चोकबाट डाइभर्सन गरिएको प्रहरीले जनायो । डिएसपी तिवारीले सम्बन्धित निकायसँग समन्वय गरी अवरुद्ध भएको बाटो खुलाउने पहल भइरहेको बताए । कास्कीमा गत शनिबार रातिदेखि मंगलबार रातिसम्म निरन्तर वर्षा भइरहेको छ ।

यसैबीच, अबरुद्ध बेनी–मालढुंगा सडक पूर्ववतरूपमा सञ्चालनमा आएको छ भने आइतबार रातिदेखि अवरुद्ध बेनी–जोमसोम सडक भने अझै सञ्चालनमा ल्याउन सकिएको छैन ।

कालीगण्डकी करिडोरअन्तर्गत बेनी–जोमसोम सडकखण्डको ठाउँठाउँमा बाढीपहिराले क्षति पु¥याएपछि आइतबार रातिदेखि नै सडकमा सिधा सवारीसाधन सञ्चालन हुन सकेका छैनन् । सडक खुलाउन प्रयास गरिएको भए पनि निरन्तर वर्षा भइरहेकाले पहिरो पन्छाउन नसिकएको बेनी–जोमसोम–कोरला सडक आयोजनाका प्रमुख जगत प्रजापतिले बताए ।

लगातारको वर्षासँगै गण्डकी प्रदेशको लाइफलाइन मानिएको बेनी–जोमसोम–कोरला सडकखण्डको विभिन्न स्थानमा बाढीपहिरोले अवरुद्ध भएको छ । म्याग्दी र मुस्ताङको सिमाना काभ्रेभीर सडकमा सुख्खा पहिराले सिधा यातायात बन्द भएको छ भने रुप्से झर्ना र बेगखोला आएको बाढीले नियमित यातायातमा समस्या भएको उनले बताए ।

पैरोथाप्ला जाने झोलुंगे पुलदेखि उत्तरतर्फ करिब ५ सय मिटर मुस्ताङतर्फको सडकमा सुख्खा पहिरो खसेको उनले बताए । बेनी–जोमसोम ७६ किमी सडकको म्याग्दी खण्ड बर्खाको समयमा बाढीपहिराको उच्च जोखिममा छ । म्याग्दी–काभे्रभीर सडकको सिमानाको बाँदरजुंगे भीर आसपासमा छिनछिनमा खस्ने पहिराले यात्रुले जोखिममा परेको छ । काभ्रेभीरमा सुख्खा पहिरो गए पनि कालिगण्डकी नदी थुनिने खतरा भने नभएको उनले बताए ।

बेनी–मालढुंगा सडक भने मंगलबार दिउँसोदेखि सञ्चालनमा आएको हो । पर्वतको कुश्मा नगरपालिका र जलजला गाउँपालिकाको सिमानामा पर्ने बेनी मालढुंगा सडकखण्डकको दमुवा खोला नजिकै झरेको पहिरो पनि जेसिबीकै सहयोगमा पन्छाएर सवारीलाई गन्तव्यमा पठाइएको छ ।

Related News

सम्बन्धित समाचार

hero news full width