म्याग्दी । म्याग्दीको मालिका गाउँपालिका वडा नम्बर २ रुम स्थित गाल्दामा पहिरोले घर पुरिँदा दुई जनाको मृत्यु भएको छ भने तीन जना बेपत्ता भएका छन् ।

मंगलबार बिहान करिब पाँच बजेको समयमा बस्ती माथिबाट खसेको पहिरोले घर परिँदा अन्दाजी ३७ वर्षीय घामबहादुर बिकका १७ वर्षीया जेठो छोरा नविन बवक र १४ वर्षीय कान्छा छोरा राजन बिकको मृत्यु भएको छ भने । घामबहादुर सहित ३२ वर्षीय श्रीमती रामु बिक र ८ वर्षीय छोरी रोजी बिक बेपत्ता भएको वडा सदस्य भक्तिप्रसाद पुनले जानकारी दिए ।

उनका अनुसार,सोही पहिरोले गोठे बिकको दुई घर पुरिएको हो । पहिरोले घर पुरिँदा गोठे बिक र उनकी श्रीमती गोरी बिक घाइते भएका छन् । अहिलेसम्म मृतक घामबहादुरका जेठा छोरा नबिन र कान्छा छोरा राजनको शव निकालिएको छ । भने तीन जना अझै बेपत्ता छन् । स्थानीय युवाहरु तिलक पुन ,यामबहादुर बिक लगायतको टोली घटना स्थलमा उद्धारमा खटिएका छन् ।

यसैगरी पहिरोमा घामबहादुरका दुई खच्चर समेत परिएका छन् । पहिरो झर्ने क्रम अहिले पनि रोकिएको छैन् । घाइते गोठे र गोरी बिकलाई उद्धार गरी उपचारको लागि रुम स्वास्थ्य चौकीमा लगिएको छ । सोमबारदेखि परेको अविरल बर्षातका कारण म्याग्दी सदरमुकाम बेनी देखी दरबाङ र मुस्ताङ जोड्ने सिधा यातायात सेवा अवरुद्ध भएका छन् ।