पोखरा । मुक्तिनाथ विकास बैंकका कर्मचारी चढेको माइक्रो दुर्घटना हुँदा १८ जना घाइते भएका छन् ।

सोमबार दिउँसो चितवन–नारायणगढ मुग्लिन सडकको भरतपुर २९, भोर्लेमा बा ३ ख ८५८८ नम्बरको माइक्रो बस दुर्घटनामा परेको हो । बस सडकबाट ३० मिटर तल खसेको छ । माइक्रो झ्याङमा अड्किंदा नजिकैको त्रिशूली नदीमा खस्नबाट जोगिएको थियो ।

चितवन जिल्ला प्रहरी कार्यालय, चितवनका प्रहरी नायव उपरीक्षक रविन विष्टका अनुसार सोमबार दिउँसो ४ बजेतिर भएको सो दुर्घटनामा १८ जना घाइतेमध्ये १ जना गम्भीर छन् । घाइतेहरूको भरतपुरस्थित चितवन मेडिकल कलेजको शिक्षण अस्पतालमा उपचार भइरहेको छ । घाइते हुनेमा टीकाराम श्रेष्ठ, प्रमिला भट्ट, सरोज खतिवडा, दीपा रेग्मी, सुजन आचार्य, सावित्री सापकोटा, स्वस्तिका आचार्य, मनोज भण्डारी, प्रकाश अधिकारी, सनिशा अधिकारी, रोजिना श्रेष्ठ छन् ।

यस्तै, नुवाकोटका जीवन कुमार, उपेन्द्र भण्डारी, सुवास नेपाल, मकवानपुरका सरोज मोक्तान, ललितपुरका विकास संजेल, दोलखाका धर्मबहादुर खड्का र चितवनकी अन्जेल कुमाल हुन् ।

माइक्रोको अगाडिको टायर खुस्किएर दुर्घटनामा परेको बताइएको छ ।