रितिकाले ल्याइन् ४.० जिपिए

आदर्श समाज सम्वाददाता
श्रावण १२, २०७९
ritika

पोखरा । पोखराको मासबारस्थित डिज्नील्याण्ड एकेडेमीकी रितिका पोखरेलले एसइईमा ४.० जिपिए ल्याउन सफल भएकी छन् । उनको सिम्बोल नम्बर ०४१०९६०६टि हो ।

हालसम्मको जानकारीअनुसार यस वर्षको एसइईमा पोखराका अन्य कुनै पनि विद्यालयबाट ४.० जिपिए नतिजा नआएको विद्यालयको दाबी छ ।

मासबार निवासी पोखरेलले कक्षा १ देखि सो स्कुलमा पढ्दै आएकी हुन् । नीलकण्ठ पोखरेल (दीपक) र आमा रीता पोखरेलका २ सन्तानमध्ये रितिका पढाइका अलावा अतिरिक्त क्रियाकलापमा समेत अब्बल रहेको विद्यालयले जनाएको छ । उनका दाइ रिदेशले सोही स्कुलबाट २ वर्षअघि ३.९५ जिपिए ल्याई उत्तीर्ण भएका थिए । विगतका दिनमा समेत उत्कृष्ट नतिजा ल्याउँदै आएको विद्यालयले पहिलो पल्ट ४.० जिपिए ल्याउँदा अत्यन्तै खुसी लागेको प्रिन्सिपल नरेशप्रसाद बरालले प्रतिक्रिया दिए ।

शिक्षक, विद्यार्थी र अभिभावकको निरन्तर सहयोगमा विद्यालयले उत्कृष्ट नतिजा हासिल गरेको विद्यालयका सहप्राचार्य समेत रहेका रितिकाका बुवा दीपक पोखरेलले बताए । नतिजापछि निकै खुसी लागेको प्रतिक्रिया दिंदै रितिकाले निरन्तर मेहनत, समयको सदुपयोग एवं शिक्षकहरुको मार्गदर्शन नै सफलताको श्रेय हो भनिन् । रितिकाको भविष्यमा चार्टर्ड एकाउन्टेन्ट (सिए) बन्ने लक्ष्य छ । उनले विज्ञान विषय लिएर उच्च शिक्षा अध्ययन गर्ने बताइन् ।

डिज्नील्याण्डबाट २८ परीक्षार्थी सम्मिलित भएकोमा ३.६ माथि ल्याउने ७ जना, ३.२ देखि ३.६ जिपिए ल्याउने ११ जना, २.८ देखि ३.२ जिपिए ल्याउने ९ जना र २.४ देखि २.८ जिपिए ल्याउने १ जना छन् । २०६३ सालमा स्थापित सो विद्यालयले हालसम्म १० औं व्याचमा विद्यार्थी सम्मिलित गराइसकेको छ । विद्यालयले पढाइका अलावा अतिरिक्त क्रियाकलापमा समेत उत्कृष्ट नतिजा हासिल गर्दै आएको अतिरिक्त क्रियाकलाप विभाग एवं कम्प्युट विभाग प्रमुख प्रेम गिरीले बताए ।

बिहीबार सार्वजनिक नतिजाअनुसार देशभर सहभागी ४ लाख ९५ हजार ७ सय ५१ परीक्षार्थीमध्ये उच्च श्रेणीमा उत्तीर्ण हुने विद्यार्थी १.९४ प्रतिशत छन् । उच्च श्रेणी ३.६ देखि ४ जिपिए ल्याउने ९ हजार ६ सय ३३ अर्थात् १.९४ प्रतिशत रहेको राष्ट्रिय परीक्षा बोर्डले जनाएको छ ।

यता, गण्डकीका शिक्षा विकास निर्देशक अम्बिका आचार्यले प्रकाशित नतिजाको तथ्यांक बोर्डले हालसम्म प्रदेशमा नपठाएको हुँदा यहाँको अवस्थाबारे ठ्याक्कै भन्न नसकिने बताए । उनले भने, ‘भोलि (बिहीबार) सम्म आउला अनि ट्याली गरेर भन्न सकिएला ।’ उनका अनुसार आगामी वर्षदेखि प्रदेशमै एसइईको रजिष्ट्रेसन फर्म भर्ने, परीक्षा लिने र कापी जाँचसहित नतिजा प्रकाशित व्यवस्था हुन सक्ने जनाए ।

Related News

सम्बन्धित समाचार

hero news full width