पोखरा । नवौं राष्ट्रिय खेलकु्द प्रतियोगिताका सबै खेल गण्डकी प्रदेशमै गर्नुपर्ने प्रदेशवासीको माग छ ।

प्रतियोगिताका लागि गठित खेलस्थल व्यवस्थापन उपसमितिको मंगलबार पोखरामामा आायजित छलफलका सहभागीले सो माग गरेका हुन् । उनीहरुले प्रतियोगितामा संचालन हुने ३६ वटै खेल गण्डकीमै हुनुपर्ने माग गरेको उपसमिति सचिव कृष्णप्रसाद तिमिल्सिनाले बताए ।

उनका अनुसार सुटिङ, स्वीमिङ लगायत खेलको लागि प्रदेशभित्रै उपयुक्त स्थानको खोजी गर्नुपर्नेमा सहभागीको जोड छ ।

राखेपका पूर्व सदस्य खड्गबहादुर रानाभाटले उक्त प्रतियोगिता प्रदेशवासीको इज्जत र प्रतिष्ठासँग जोडिएकोले कुनै पनि खेलको लागि अनुकूल वातावरण बनाउनु पर्नेमा जोड दिए । पोखरा रंगशाला जग्गा प्लटिङ भएसरी मनपरी भौतिक संरचना भएको उनको गुनासो थियो ।

उपसमिति संयोजक राजेशकुमार गुरुङले छलफलमा उठेका विषयहरु र प्रदेशका विभिन्न ठाउँमा खेल मैदानहरुको अध्ययन अवलोकन गरेको आधारमा साउन १५ गते हुने राखेपको बोर्ड बैठकमा राख्ने बताए ।

सरकारले आगामी असोज २८ देखि कात्तिक ३ सम्म गण्डकी प्रदेशमा नवौं राष्ट्रिय खेलकुद प्रतियोगिताको तिथि तोकेको छ ।