पोखरा । कल्याण शेरचन स्मृति प्रतिष्ठान नेपालको आयोजनामा पोखरामा राष्ट्रिय खुला दोहोरीगीत प्रतियोगिता हुने भएको छ । लोक स्रष्टा, साधक तथा शिल्पी कल्याण शेरचनको ७६ औं जन्मजयन्तीमा नेपालकै सर्वाधिक पुरस्कार राशिको सो प्रतियोगिता हुने बुधबार पत्रकार सम्मेलनमा जनाइयो ।

साउन १२ देखि १४ सम्म पोखरा सभागृहमा स्रष्टा सम्मान तथा राष्ट्रिय खुला दोहोरीगीत प्रतियोगिता सञ्चालन गर्ने प्रतिष्ठान अध्यक्ष क्या. पूर्णबहादुुर गुरुङ ‘ह्योल्मो’ ले बताए । उनका अनुसार विजेता जोडीले ६ लाख प्राप्त गर्नेछ । द्वितीयले ४ लाख, तृतीयले २ लाख र सान्त्वना जोडी १ लाखको हकदार बन्नेछ । उत्कृष्ट गायक र गायिकालाई जनही ५० हजार र अनुशासित एक समूहलाई ५० हजार प्रदान गरिने छ ।

कार्यक्रममा यस वर्ष स्व.योगन्द्रबहादुर बस्नेत (मरणोपरान्त) र कलाकार तथा संगीतकार नारायण रायमाझीलाई २५ हजारसहित सम्मान गरिने स्रष्टा सम्मान छनोट समितिका संयोजक खेम गुुरुङले बताए । प्रतियोगितामा देशभरबाट करिब प्रतियोगितामा ४० देखि ४५ समूहको सहभागिता रहने प्रतिष्ठान सचिव तथा कार्यक्रम संयोजक जीवन दाहालले बताए । उनका अनुसार एउटा टोलीमा एक पुरुष र एक महिला रहने छन् । प्रतियोगिता निर्णायक मण्डल संयोजक राष्ट्रिय लोक तथा दोहारीगीत प्रतिष्ठान अध्यक्ष रमेश बिजी हुन् ।