पोखरा । नवनिर्मित पर्यटक बसपार्क पोखरा उपत्यका नगर विकास समितिलाई हस्तान्तरण गरिएको छ । संस्कृति, पर्यटन तथा नागरिक उड्डयन मन्त्रालयमा बुधबार एक समारोहबीच विभागले समितिलाई बसपार्क हस्तान्तरण गरेको हो ।

कार्यक्रममा पर्यटन मन्त्री जीवनराम श्रेष्ठले पर्यटकीय सहर पोखरामा पर्यटक बसपार्क निर्माणले पर्यटकीय क्षेत्रमा पक्कै पनि उत्साह थप्ने अपेक्षा प्रकट गरे । उपत्यका नगर विकास समिति र पोखरा महानगरले उक्त बसपार्कको उपयोग गर्नेमा आफू विश्वस्त रहेको उनले बताए । पोखरामा थप पर्यटकीय पूर्वाधार बन्ने र त्यसका लागि पोखरा महानगरपालिकासहित समग्र पर्यटनसम्बद्ध संस्थासँग मन्त्रालयले सहकार्य गर्ने विश्वास दिलाए । उनले पोखरालाई देशकै पर्यटकीय राजधानी घोषणाका लागि आगामी मन्त्रिपरिषदमा प्रस्ताव लैजाने तयारी गरेको जानकारी दिए ।

पोखरा महानगरका प्रमुखसमेत रहेका पोखरा उपत्यका नगर विकास समतिका अध्यक्ष धनराज आचार्यले सुविधासम्पन्न बसपार्क निर्माण गरी हस्तान्तरण गरेकोमा हार्दिक आभार प्रकट गरे ।

बसपार्क निर्माणको जिम्मा पाएको निर्माण कम्पनी आशीष÷सिएम÷मिसन जेभीका डाइरेक्टर सान्तकुमार श्रेष्ठका अनुसार पर्यटककी बसपार्कमा ४० वटा पर्यटकवाहक बस आवतजावत गर्न सक्नेछन् । १० वटा माइक्रो बस, २० वटा ट्याक्सी पार्किङ गर्ने स्थल र केही कारसमेत राख्ने स्थल छ । बसपार्कको दक्षिण पूर्वबाट बस प्रवेश गर्ने र दक्षिण पश्चिमबाट बस बाहिरिने व्यवस्था छ । बसपार्कको पश्चिम र पूर्वी भागमा दुबैतर्फ १ सय ३० मिटर लामा नाला (ढल) निर्माण भएका छन् ।

बसपार्कको बीचमा आकर्षक आइल्यान्ड गार्डेन निर्मित छ । डिभाइडरमा समेत फूल रोपेर आकर्षक बनाइने छ । बसपार्कमा व्यवस्थित शौचालय, चमेनागृह लगायतका प्रयोजनका लागि भवन निर्माण भएको छ । पर्यटन विभागका निर्देशक तारानाथ अधिकारीका अनुसार ८ करोड ४५ लाख ८३ हजार रुपैयाँ लागतमा बसपार्क निर्माण भएको हो ।