पोखरा । महिला उद्यमी संघ र हिमाली पवित्र आमा समूहको संयुक्त आयोजनामा सिताके च्याउ तथा कुरिलो व्यावसायिक खेती तालिम भएको छ । पोखरा वडा १७ को सहयोगमा ड्यामसाइडमा ३ दिनसम्म चलेको तालिममा १ सय जनाको सहभागिता थियो ।

वडाध्यक्ष राधिकाकुमारी शाहीले च्याउ तथा कुरिलो घरको सानो खाली स्थानमा उत्पादन गर्न सकिने हुँदा सहरमा बसेर पनि अर्गानिक, ताजा तरकारी खान पाइने बताइन् ।

महिला उद्यमी संघकी अध्यक्ष पार्वती पौडेलले तालिम प्राप्त गरेर मात्र उद्यम गर्दा उद्यमशीलताको विकास गर्न सकिने बताइन् । च्याउ तथा कुरिलो व्यवसायमा आउन चाहनेलाई तालिमले सहयोग पु¥याउने उनको भनाइ छ ।

उनका अनुसार तालिममा पोखरा १७ का आमा समूह, युवा क्लब, महिला क्लब, टोल विकास संस्थाका प्रतिनिधिको सहभागी थियो । सैद्धान्तिक र प्रयोगात्मक विधिबाट प्रदान गरिएको तालिम प्रभावकारी भएको सहभागीको प्रतिक्रिया थियो । उनीहरुलाई काठको मुढा, च्याउको बिउ, कुरिलो र कागतीको बेर्ना वितरण गरिएको थियो ।

तालिममा पोखरा महानगर कृषि महाशाखाका प्राविधिक सुरोज सिलुवाल र शिवसिंह धामीले प्रशिक्षण दिएका थिए । यस्तै, सिताके च्याउ व्यवसायी पदमबहादुर ढकालको च्याउ फर्म पनि अवलोकन गरिएको थियो । कार्यक्रम हिमाली पवित्र आमा समूह अध्यक्ष सावित्री अर्यालको अध्यक्षतामा भएको हो ।