वेसीशहर । ‘हाम्रो एक गोल, महिला हिंसाविरुद्धको बोल’ नाराका साथ बेंसीसहरमा प्रथम खुला महिला फुटसल प्रतियोगिता–२०७९ सुरु भएको छ । लिग आधारमा खेलाइएको उक्त प्रतियोगितामा ८ टिमले भाग लिएका छन् ।

प्रतियोगिता फाइनलमा एक्स गोर्खा कास्की र मिनाम लांघाली लमजुङ फाइनल प्रवेश गरेका छन् ।

सेमिफाइनलमा एक्स गोर्खा कास्कीले बाघेता लमजुङ टिमलाई शून्यका विरुद्ध २ गोल गरी उपाधि नजिक पुगेको हो । निर्धारित समयमा दुवै टिमबाट गोल नभएपछि खेल टाइब्रेकरमा धकेलिएको थियो ।

अर्को सेमिफाइनल मिनाम लांघाली लमजुङ र एरिन काठमाडौंबीच भएको हो । खेलमा ४–१ गोलअन्तरले पराजित गर्दै मिनाम लांघाली फाइनलमा प्रवेश गरेको आयोजक फुटसल लमजुङका सञ्चालक इन्द्र रानाले बताए ।

प्रतियोगितामा लमजुङका अतिरिक्त तनहुँ, गोरखा, कास्की र काठमाडौंका ८ टिमले भाग लिएका हुन् ।

महिलालाई खेलप्रति आर्कषित गर्न, महिला खेलाडी उत्पादन गर्ने तथा लुकेर रहेको प्रतिभालाई उजागर गर्ने उद्देश्यका साथ पहिलो पटक जिल्लाकै ठूलो धनराशीको महिला खुल्ला फुटसल प्रतियोगिता आयोजना गरिएको हो । विजेतालाई ५० हजार रुपैयाँ, ट्रफी, मेडल र प्रमाणपत्र रहेको छ । द्वितीय हुने टिमलाई २५ हजार, ट्रफी, मेडल र प्रमाणपत्र प्रदान गरिने छ ।

यस्तै, उत्कृष्ट खेलाडी, सर्वाधिक गोलकर्ता र उत्कृष्ट गोल किपरलाई जनही १ हजार ५ सय नगद, मेडल र प्रमाणपत्रबाट पुरस्कृत गर्ने कार्यक्रम छ । उत्कृष्ट प्रशिक्षकलाई ट्रफी, मेडल र प्रमाणपत्र प्रदान गरिने आयोजकले जनायो ।