पोखरा । जिल्ला समन्वय समिति कास्कीको आयोजनामा जिल्लाको वार्षिक समीक्षा गरिएको छ । पूर्व युवा तथा खेलकुद मन्त्री एवं प्रतिनिधि सभा सदस्य जगत विश्वकर्माले कार्यक्रम उद्घाटन गरे । उनले सुशासन, विकास र समृद्धिको राष्ट्रिय अभिभारा पूरा गर्न सबै लागि पर्नुपर्ने भन्दै निर्वाचित जनप्रतिनिधि, राष्ट्रसेवक कर्मचारी र जनताको एकीकृत प्रयासले मात्रै सो सम्भव हुने बताए । विश्वकर्माले समृद्धिको नेतृत्व कास्कीले गर्नुपर्ने भन्दै हरतरहले प्रयास केन्द्रित गर्न आग्रह गरे ।

प्रतिनिधिसभा सदस्य विद्या भट्टराई अधिकारीले विकासका लागि प्रतिबद्धता र कार्यान्वयन महत्वपूर्ण हुने बताइन् ।

प्रतिनिधि सभा सदस्य दुर्गा विकले जनप्रतिनिधि साझा भएको भन्दै विकासमा राजनिित नगर्न जनप्रतिनिधिलाई सुझाव दिइन् । उनले सबैको साझा एजेन्डा विकास भएकोले त्यसैमा केन्द्रित हुन सबैलाई आग्रह गरिन् ।

गण्डकी प्रदेश सभाका उपसभामुख सृजना शर्माले गम्भीर समीक्षासहित विकासको काममा खटिन जनप्रतिनिधिलाई आग्रह गरिन् ।

जिल्ला समन्वय समिति कास्की प्रमुख लीलाधर पौडेलले जनअपेक्षा पूरा गर्न सबै पालिकाका प्रतिनिधि र राष्ट्रसेवक कर्मचारी लाग्न आग्रह गर्दै स्थानीय तह कास्कीमा बेरुजुमुक्त पूर्ण समृद्ध जिल्ला निर्माणमा लाग्न आग्रह गरे ।

कार्यक्रममा कास्कीका पालिकाहरु र विषयगत कार्यालयको तर्फबाट समीक्षा प्रतिवेदन प्रस्तुत गरिएको थियो ।

जिसस प्रमुख लीलाधर पौडेलको अध्यक्षतामा भएको समीक्षा कार्यक्रममा स्वागत उप प्रमुख सरिता माल र सञ्चालन जिल्ला समन्वय अधिकारी नवराज बरालले गरेका थिए ।