पोखरा । किसानलाई तत्काल मल र बिउ उपलब्ध गराउन माग गर्दै राष्ट्रिय प्रजातन्त्र पार्टी कास्कीले पोखरास्थित कृषि ज्ञान केन्द्रको कार्यालयमा धर्ना दिएको छ ।

सरकारले बर्खा लागिसक्दा समेत किसानलाई बिउ र मल जस्ता अत्यावश्यक बस्तु उपलब्ध गराउन नसकेकाले सोको माग गर्दै धर्ना दिइएको राप्रपा कास्की प्रवक्ता अरुण गिरीले जानकारी दिए ।

धर्नाका सहभागीले किसानलाई समयमै मल बिउविजन वितरण गर, किसानका उत्पादनका उचित बजार मूल्य व्यवस्था गर, कृषिको आधुनिकीकरण गर, किसानलाई उचित तालिमको व्यवस्था गर जस्ता नारा अंकित प्लेकार्ड बोकेका थिए ।

धर्नापछि आयोजित कोणसमा राप्रपा गण्डकी अध्यक्ष पञ्चाराम गुरुङले सरकार किसानको खिलापमा रहेको बताए । ‘कृषिप्रधान देशमा सरकारले किसानको न आवाज सुन्छ न समस्या बुझ्छ, उनले भने, किसानलाई सधैं गरिबीकै रेखामुनि राख्ने षड्यन्त्र सरकारले गरेको छ ।’

कार्यक्रममा राप्रपा कास्कीका अध्यक्ष नारायण गुरुङले किसानका आवश्यकता पूरा नगरेसम्म आन्दोलन जारी रहने चेतावनी दिए । कार्यक्रममा नेताहरु जयलाल पुन, शंकर खराल लगायतले किसानको हितमा सरकारले ध्यान दिनुपर्ने बताए ।