पोखरा । पोखरा राष्ट्रिय साइक्लिङ प्रतियोगिताको उपाधि पुरुषतर्फ हिमाल टमाटा र महिलातर्फ उषा खनालले जितेका छन् । नेपाल आर्मीका टमाटाले निर्धारित ४५ किमीको दुरी २ घण्टा ३४ मिनेट १० सेकेण्डमा पार गर्दै प्रथम भएका हुन् । सोही दुरी ३ घण्टा ८ मिनेट ४० सेकेण्डमा पार गर्दै महिलातर्फ खनाल प्रथम भएको आयोजक पोखरा महानगर खेलकुद विकास समितिले जनाएको छ ।

साइकल सिटी पोखरा र साइक्लिङ संघ कास्कीको सहआयोजनामा शनिबार भएको प्रतियोगितामा पुरुषतर्फ एपीएफका लक्ष्मण मल्ल द्वितीय र कास्कीका हिक्मत विक तृतीय भए । महिलातर्फ नुवाकोटकी लक्ष्मी मगर द्वितीय र धरानकी इन्द्रकुमारी तामाङ तृतीय भइन् ।

पुरुष र महिलातर्फ प्रथम, द्वितीय र तृतीयले क्रमशः ३०, २० र १० हजार रुपैयाँ, मेडल र प्रमाणपत्र पाए । सहभागी सबैलाई मेडल र प्रमाणपत्र प्रदान गरिएको महानगर खेलकुद विकास समितिका सदस्य सचिव सुवास खड्काले जानकारी दिए ।

पोखरा महानगर खेलकुद विकासले पहिलो पटक आयोजना गरेको प्रतियोगितामा ८१ खेलाडीले भाग लिएका थिए

प्रतियोगितामा पोखरा, काठमाडौँ, गोरखा, बुटवललगायत ठाउँका ८१ खेलाडी सहभागी थिए । पुरुष ७६ जना र महिला ५ जना प्रतियोगितामा सहभागी भएको सहआयोजक साइक्लिङ संघ कास्कीका अध्यक्ष शंकर भण्डारीले जानकारी दिए ।

पोखरा १६ स्थित कालीखोलाको पुलबाट सुरु प्रतियोगिता र्‍यालेचौर, मौजा, आँटीघर, अर्मलाकोट, ढिकीडाँडालगायत ठाउँ हुँदै कालीखोलाको पुलमै पुगेर सकिएको थियो ।

प्रतियोगिता उद्घाटन गर्दै पोखरा महानगरपालिकाका मेयर धनराज आचार्यले आउँदो बजेटमा खेलकुद प्रवद्र्धन गर्न सक्ने गरी रकम विनियोजन गर्ने प्रतिबद्धता जनाए । विभिन्न पेसा व्यवसायमा आवद्ध व्यक्तिलाई एकै ठाउँमा उभ्याउने भएकाले खेलकुद एकताको प्रतीक भएको उनले बताए ।

महानगर खेलकुद विकास समिति अध्यक्ष दीपक गोदारले पहिलो पटक साइक्लिङ प्रतियोगिता आयोजना गरेको बताउँदै आगामी दिनमा निरन्तरता दिने बताए । पोखरामा साइक्लिङको सम्भावना भएको र स्वास्थ्यका लागि पनि राम्रो हुने भएकाले यसमा जोड दिने उनको भनाइ छ ।