पोखरा । गण्डकी प्रदेशले आगामी आर्थिक वर्ष २०७९/०८० बजेटमा खेलकुदको पूर्वाधार निर्माणका लागि १५ करोड खर्च गर्ने भएको छ । गण्डकी प्रदेशका अर्थमन्त्री रामजीप्रसाद बरालले प्रदेश सभामा प्रस्तुत गरेको बजेटमा खेलकुदको पूर्वाधार निर्माणका लागि १५ करोड खर्च गरिने जनाएका हुन् ।

‘एक स्थानीय तह एक खेल मैदान’ कार्यक्रमलाई निरन्तरता दिंदै मन्त्री बरालले खेलकुद पूर्वाधारको निर्माणमा जोड दिइ पोखरा रंगशाला, विभिन्न कभर्डहल स्तरोन्नति गरिने घोषण गरे । प्रदेश राजधानी पोखरामा राष्ट्रिय तथा प्रादेशिक खेलकुद प्रतियोगिता सञ्चालन गर्ने गरी पूर्वाधार स्तरोन्नतिमा नेपाल सरकारसँग साझेदारी गर्ने उनले बताए ।

नवौं राष्ट्रिय खेलकुद प्रतियोगितामा प्रदेशको प्रभावकारी सहभागिताका लागि आवश्यक बजेट व्यवस्था गरेको जनाउँदै राष्ट्रिय खेलकुद प्रतियोगितामा स्वर्ण पदक विजेताका लागि प्रोत्साहन स्वरुप नगद पुरस्कारको व्यवस्था गरिने भएको छ ।

राष्ट्रिय तथा प्रदेशस्तरीय खेलकुद प्रतियोगितामा भाग खेलाडीको बिमा प्रदेश सरकारले गर्ने भएको छ । यस्तै, प्रदेशस्तरीय, राष्ट्रिय तथा अन्तर्राष्ट्रिय प्रतियोगिता आयोजना गर्न र ती प्रतियोगितामा भाग लिने खेलाडीलाई प्रोत्साहन गरी समग्र खेलकुदको विकासका लागि आवश्यक बजेट छुट्टाइएको छ ।

त्यसैगरी, साहसिक खेलको प्रवद्र्धन एवं प्रतियोगिताको आयोजना गर्दै खेल पर्यटनको प्रवद्र्धन गर्नेसँगै प्रदेश सरकार र निजी क्षेत्रको सहकार्यमा सांस्कृतिक, धार्मिक, साहसिक, कृषि, स्वास्थ्य, खेल पर्यटक आकर्षित गर्न कार्यक्रम सञ्चालन गरिने प्रदेश सरकारले सार्वजनिक बजेटमा उल्लेख छ ।

बुधबार गण्डकी प्रदेश सरकारले आगामी आर्थिक वर्ष २०७९/०८० को लागि ३५ अर्ब ९० करोड ९० लाख रुपैयाँको बजेट सार्वजनिक गरेको हो । आगामी आवको लागि विनियोजनमध्ये चालुतर्फ १३ अर्ब २६ करोड ८८ लाख ५४ हजार अर्थात् ३६.९५ प्रतिशत र पुँजीगततर्फ २२ अर्ब १४ करोड १ लाख ४६ हजार अर्थात् ६१.६६ प्रतिशत र वित्तीय व्यवस्थातर्फ ५० करोड अर्थात् १.३९ प्रतिशत रहेको छ ।

सार्वजनिक बजेटमा वार्षिकरुपमा ३ सय जनाभन्दा बढीलाई प्रत्यक्ष रोजगारी दिने उत्पादनमूलक उद्योग स्थापना गर्न वा विस्तार गर्नका लागि जग्गा खरिद गर्दा लाग्ने रजिष्ट्रेशन शुल्कको लिखतमा पूर्ण छुट दिइएको छ ।