पोखरा । पोखराको सेदी बगरदेखि सराङकोटसम्म सञ्चालनमा रहेको अन्नपूर्ण केबलकारले सेवा दिँदै आएको समयमा परिवर्तन गरेको जनाएको छ । सनराइज हेर्न जाने यात्रु लक्षित बिहानी सेवा मौसमका कारण असार १ गतेदेखि भदौ मसान्तसम्म लागि स्थगित गरेको केबलकारले जानकारी दिएको छ ।

बिहान ५ बजेदेखि ९ बजेसम्म सनराइज हेर्न जाने यात्रु लक्षित सेवामात्र वर्षाका कारण मौसममा समस्या देखिएकाले भाद्र मसान्तसम्मका लागि स्थगित गरिएको हो । बिहान ९ बजेपछिका दिवा सेवा भने नियमित रहने पनि सो कम्पनीले जानकारी दिएको छ ।

मौसम खुलेसँगै केबलकारमा चढेर सनराइज हेर्ने सेवा आगामी असोज १ गतेदेखि पुन सञ्चालनमा आउने बताइएको छ । अन्नपूर्ण, माछापुच्छ«ेलगायत हिमाली शृंखलाको आनन्द लिँदै केबलकार परिसरबाट पोखरा सहर, फेवाताल, शिव मूर्ति, विश्व शान्ति स्तुपलगायत दृश्य पनि हेर्न सकिन्छ ।

केबलकारको माथिल्लो स्टेसनमा भ्यु टावर, गार्डेन, पार्किङ संरचना, रेस्टुरेन्ट, कफी सप, जिप लाइन, स्काइ साइक्लिङ र स्वीङ सञ्चालनमा छन् ।