पोखरा । बुद्ध विशाल बजार व्यापारिक एसोसिएसनले व्यवसायीबीच १० औं आन्तरिक फुटसल प्रतियोगिता गरेको छ । प्रतियोगितामा विशाल श्रेष्ठको टिम प्रथम र सञ्जय बुढाथोकीको टिम दोस्रो भयो । प्रथम र द्वितीयलाई क्रमशः १५ र १० हजार साथमा सिल्ड, मेडल र प्रमाणपत्र वितरण गरियो । उत्कृष्ट खेलाडीको उपाधि रोशन नेप्कुलले प्राप्त गरे ।

पोखरा ४ का नवनिर्वाचित वडाध्यक्ष देवकृष्ण पराजुलीले व्यवसायीहरूको समस्या समाधान गर्न आफू प्रतिबद्व रहेको बताए । एसोसिएसनले आफूलाई गरेको सम्मानले थप जिम्मेवारी महसुस गराएको पनि उनको भनाइ छ ।

एसोसिएसन अध्यक्ष केशवबहादुर खत्रीले महेन्द्रपुल, पालिखेचोकमा पार्किङको समस्या रहेकोले सहजीकरण गरिदिन वडाअध्यक्ष पराजुलीलाई आग्रह गरे । उनले वार्षिक रूपमा फुटसल प्रतियोगिता आयोजना गरिरहेकोमा २ वर्ष कोभिड कारण रोकिएको बताउँदै आगामी वर्षमा निरन्तरता दिने बताए ।

कार्यक्रममा सर्वेश्वर व्यवसायी समिति अध्यक्ष बालकृष्ण भण्डारी बगर कल्याणकारी व्यवसायी समिति अध्यक्ष विष्णु बास्तोला फेन्सी, रेडिमेड व्यवसायी संघका अध्यक्ष राजु पौडेल लगायतले कार्यक्रमको सफलताको कामना गरे ।

एसोसिएसन अध्यक्ष खत्रीको अध्यक्षतामा भएको कार्यक्रमको सञ्चालन महासचिव बुद्धिबहादुर कँुवर, स्वागत उपाध्यक्ष इन्द्रराज अर्याल र धन्यवाद ज्ञापन कोषाध्यक्ष तथा कार्यक्रम संयोजक थमनसिह गुरूङले गरेका थिए ।