पोखरा । माउण्ट अन्नपूर्ण सेकेन्डरी स्कुल, नदीपुरले आयोजना गरेको प्रथम सुजिना स्मृति तथा दोस्रो एसइई थ्रि बाइ थ्रि अन्तरविद्यालय छात्रछात्रा बास्केटबल उपाधि पुरुषतर्फ पर्वत ब्वाइज र महिलातर्फ न्यु ग्यालेक्सीले जितेका छन् ।

शुक्रबार फाइनलमा छात्रतर्फ पर्वत ब्वाइजले न्यु ग्यालेक्सीलाई पराजित गर्दै उपाधिसहित ११ हजार रुपैयाँ हात पा¥यो । उपविजेता न्यु ग्यालेक्सीले ६ हजार साथमा ट्रफी, मेडल हात पारेको थियो ।

उता, छात्रातर्फ न्यु ग्लोक्सीले रेड रोजेजलाई हराउँदै उपाधिसहित ११ हजार हात पारेको थियो । उपविजेताले ६ हजार साथमा ट्रफी, मेडल हात पारेको थियो । प्रतियोगितामा छात्रछात्रातर्फ २२ टिमले भाग लिएका थिए । छात्रतर्फ पर्वत क्लबका अभिनव बराल उत्कृष्ट खेलाडी र सर्वाधिक गोलकर्ता ग्यालेक्सीका आशीष थकाली भए । छात्रातर्फ रेड रोजेजकी सिम्रन गुरुङ उत्कृष्ट हुँदा न्यु ग्यालेक्सीकी रक्षा गुरुङ हाइ स्कोरर बनिन् । उनीहरुले जनही १ हजार पाए ।

गत वर्षदेखि सुरु एसइई कपलाई वैशाख १८ मा सडक दुर्घटना ज्यान गुमाएकी कक्षा १२ की छात्रा सुजिना तिलिजा पुनको स्मृतिमा बास्केटबल आयोजना गर्ने निर्णय विद्यालयले गरेको थियो ।

विजेतालाई पोखरा २ का वडाध्यक्ष दिवसमान प्रधानाङ्ग, प्रदेश खेलकुद परिषद् गण्डकीका सचिव सदस्य तेजबहादुर गुरुङ, विद्यालय प्रिन्सिपल सइन्द्र श्रेष्ठ, प्लस टु संयोजक कृष्ण लम्साल, स्व. सुजिनाकी आमा मीना तिलिजा पुन लगायतले नगद, ट्रफी, मेडल र प्रमाणपत्र प्रदान गरेका थिए ।

कार्यक्रममा वडाध्यक्ष उदासले वडामा रहेको माउन्ट अन्नपूर्ण मावि सो क्षेत्रकै सबैभन्दा पुरानो र उत्कृष्ट निजी विद्यालय रहेको र यस विद्यालयले अवलम्वन गरेका खेलकुद लगायतका अतिरिक्त क्रियाकलापमा वडाको सधैं सहयोग रहने बताए ।

विद्यालय अध्यक्ष गिरीप्रसाद गुरुङको अध्यक्षतामा भएको प्रतियोगितालाई आगामी दिनमा पनि सुजिनालाई स्मरणीय बनाइराख्न निरन्तरता दिने विद्यालयले जनाएको छ । प्रतियोगिता २ दिनसम्म चलेको थियो ।