पोखरा । गण्डकी प्रज्ञा प्रतिष्ठानले असार १० देखि १२ सम्म पोखरामा ‘प्रज्ञा उत्सव’ आयोजना गर्ने भएको छ । प्रतिष्ठानकै हलमा आयोजना हुने सो उत्सवमा विविध कार्यक्रम हुने प्रतिष्ठानका सदस्य सचिव मनकुमार श्रेष्ठले जनाए ।

पहिलो दिन आर्ट कार्यशाला, दोस्रो दिन कविता, गजल, मुक्तक, लघुकथा वाचन कार्यक्रम हुनेछ । सोही दिनमा नाटक धनीरामको गोरुसमेत मञ्चन गरिनेछ उनले बताए ।

असार १२ मा विभिन्न सांस्कृतिक प्रस्तुति, एकेडेमीको वार्षिक कार्यक्रम श्रव्यदृश्यमार्फत जानकारी, विभिन्न जातिको झाँकी प्रदर्शन हुनेछ । सोही दिन कला, साहित्य, संगीत र संस्कृति क्षेत्रमा योगदान पुर्‍याउने १–१ जना व्यक्तिलाई सम्मान समेत गर्ने प्रतिष्ठानले जनाएको छ । साथै, पुस्तक प्रदर्शन, लोपोन्मुख बाजा प्रदर्शन, पृथ्वीनारायण क्याम्पस विज्ञान संकायका विद्यार्थीद्धारा तयार गरिएका सामाग्रीको प्रर्दशन समेत प्रज्ञा उत्सवको आकर्षणको रुपमा रहनेछ ।

सो कार्यक्रम नयाँ पुस्तालाई मौलिक संस्कृतिबारे जानकारी दिनु र उनीहरुमा अभिरुचि प्रदान गर्नु रहेको छ । निरन्तर यसै क्षेत्रमा लागेकाहरूलाई सम्मानमार्फत हौसला बढाउन मात्र नभएर श्रष्टालाई एकेडेमीसँग साक्षात्कार गराउने कार्यक्रमको लक्ष्य रहेको उनले बताए ।

प्रतिष्ठानले साहित्यका सबै विधालाई महत्वका साथ स्थान दिंदै यिनको संरक्षण तथा प्रवद्र्धन गर्न क्रियाशील बन्ने उपकुलपति गोरे गुरुङले बताए । ‘प्रज्ञा उत्सव’ कार्यक्रममका सहभागी भई रौनकता प्रदान गरिदिन सबैमा उनको आग्रह छ ।

२०७८ बैशाख १५ मा स्थापित प्रतिष्ठान स्थापनाको छोटो समयमै विभिन्न महत्वपूर्ण कार्यक्रम आयोजना गरिसकेको छ ।