पोखरा । पोखरा महानगरपालिकाले सडकका छाडा चौपाया हटाउने कार्य सुरु गरेको छ । बिहीबार ३७ छाडा चौपाया संकलन गरेर कान्जीहाउसमा राखिएको महानगरका वरिष्ठ कानून अधिकृत नारायणप्रसाद शर्माले जानकारी दिए ।

‘मेयरसावको निर्देशन अनुरुप पोखराका सडकलाई छाडा चौपाया मुक्त गर्ने प्रयास स्वरुप हामीले छाडा चौपाया संकलन गरे कान्जी हाउसमा राख्न थालेका छौं,’ शर्माले भने ।

छाडा चौपाया संकलन गरी पोखरा १४ स्थित बाच्छेबुढुवामा रहेको गौशालामा लगिनेछ । ल्याण्डफिलसाइडसँगै रहेको गौशालामा हाल १ सय ५० को हारारहारीमा छाडा चौपाया छन् । करिब ३५ रोपनीमा चौपायाको चरन क्षेत्र र १० रोपनी क्षेत्रमा तारबार लगाएर छानाको व्यवस्थापन गरिएको छ ।

वरिष्ठ कानुन अधिकृत शर्माले सडकमा छाडा चौपाया देखिए वडाहुँदै महानगरमा खबर गर्न समेत नगरवासीलाई आग्रह गरेका छन् ।