पोखरा । गण्डकी प्रदेश सरकारको आयोजनामा हुने रोजगार मेला तयारीस्वरुप स्थानीय तह र रोजगारदातासँग अन्तक्र्रिया गरिएको छ । शिक्षा, संस्कृति, विज्ञान, प्रविधि तथा सामाजिक विकास मन्त्रालय र गण्डकी प्राविधिक शिक्षा तथा व्यावसायिक तालिम प्रतिष्ठानले बिहीबार आयोजना गरेको अन्तक्र्रियामा जनप्रतिनिधि र सरोकारवालाको सहभागिता थियो ।

सामाजिक विकास मन्त्री मेखलाल श्रेष्ठले असांगठनिक क्षेत्रमा काम गर्नेलाई संगठित बनाउन मेलाको आयोजना गर्न लागिएको बताए । सरकारले नागरिकलाई स्वदेशमै राख्ने योजनाको सुरुआत मात्रै गर्न लागेको उनको भनाइ थियो । ‘यो त सुरुआतमात्रै हो । हामीले मुख्यगरी २ कुरालाई जोड दिनेछौं’, उनले भने । मजुदर र रोजगारदाताको समस्या पहिचान गर्दै समाधान गरी एकै ठाउँमा टिक्न सक्ने वातावरण तयार गर्न मेलाले सघाउ पुग्ने उनको धारणा थियो । प्रदेशभरका उद्योग, कलकारखाना र अन्य क्षेत्रमा आवश्यक जनशक्ति उत्पादन गर्नका साथै कार्य क्षेत्रमा परिचालन गर्ने गरी मेला आयोजना गरिने उनले बताए ।

मन्त्री श्रेष्ठले सरकारको जानकारीमा नआएका धेरै क्षेत्र रहेको र त्यहाँ सीप भएका कामदार भए पनि व्यवस्थित नहुँदा विदेशीन बाध्य भएकाले अब विदेश जान नभई स्वदेशमै रोजगारको व्यवस्थापन गर्नेतर्फ प्रदेश सरकार उदार भएको बताए ।

रोजगार मेलाले २ सय बढी बेरोजगार युवालाई रोजगार दिने अपेक्षा गरिएको सामाजिक विकास मन्त्रालयका सचिव देवेन्द्र लामिछानेले बताए । मेलको १ हजार बढीले अवलोकन गर्नेछन् । व्यावसायिक तालिम लिन चाहने विद्यार्थीका लागि पर्याप्त जानकारी दिने समेत प्रदेशको योजना रहेको उनले सुनाए ।

मेलाले २ सय बढी बेरोजगार युवालाई रोजगार दिने

नेपाल सरकार र स्वस्स सरकारको सहयोगले सञ्चालनमा रहेको नेपाल व्यावसायिक योग्यता प्रणली परियोजना दोस्रो चरणअन्तर्गत रोजगार मेला आयोजना गरी प्र्राविधिक शिक्षा तथा व्यावसायिक तालिम र पुर्व ज्ञानको मान्यतामा आधारित सिकाइको बारेमा जानकारी प्रदान गर्न मेला आयोजना गर्न लागिएको सचिव लामिछानेले बताए । उनले दोस्रो चरणको छलफलपछि मिति तय गर्ने बताए । उनले मेलाले सीप भएर पनि जागिर नपाएर विदेशीन बाध्य नागरिकलाई स्वदेशमै राख्ने बताए । गण्डकी प्राविधिक शिक्षा तथा व्यावसायिक तालिम प्रतिष्ठानका कार्यकारी निर्देशक डा. सोमनाथ सापकोटाले मेलापछि सीप भएर पनि विदेशीन बाध्य नागरिकलाई स्वदेशमै राख्न मद्दत गर्ने बताए । रुपा गाउँपालिकाका अध्यक्ष नवराज ओझाले गाउँघरका परपम्परागत सिपलाई संरक्षण गर्ने गरी मेला आयोजना गर्नुपर्ने सुझाव दिए । गाउँपालिकाका लागि पनि धेरै कामदार आवश्यक परेकाले त्यसलाई आवश्यक जनशक्ति उत्पादनमा जोड दिनुपर्ने उनको भनाइ थियो ।

नेपाल उद्योग वाणिज्य महासंघ गण्डकी अध्यक्ष सञ्जीवबहादुर कोइरालाले विदेशबाट कामदार ल्याउनुभन्दा पनि नेपालमै दक्ष जनशक्ति उत्पादनमा मेलाले सघाउने बताए । गण्डकीमा २० वटा उद्योग वाणिज्य संघ रहेकाले सबैले मेलामा सहकार्य गर्ने उनले बताए ।

कार्यक्रममा सिटिइभिटीका निर्देशक प्रमोदभक्त आचार्य, सामाजिक विकास मन्त्रालय उपसचिव तोया लम्साल, नेपाल व्यावसायिक योग्यता प्रणाली परियोवजनाका भानु पण्डित र कञ्चन तामाङले मेलासँग सम्बन्धि प्रस्तुति राखेका थिए । रुपा गाउँपालिका उपाध्यक्ष लालसुबा गुरुङले परम्परागत सीपलाई पनि ध्यान दिनुपर्ने बताइन् । फर्निचर व्यावसायी संघ कास्कीका पूर्व अध्यक्ष प्रेमराज बसौलाले गाउँबाट सहर झर्नेहरुलाई दक्ष कसरी बनाउँन सकिन्छ भन्नेमा सरकारले सोच्नुपर्ने बताए । होटल एसोसिएसन गण्डकी अध्यक्ष हरि शर्माले कुन क्षेत्रमा कति जनशक्ति आवश्यक छ भनेर सर्वेक्षण गर्नुपर्ने बताए । मेलामा अनुभवीमात्र नभई नयाँ जनशक्तिका लागि समेत अवसरको सिर्जना गर्ने किसिमको बनाउन आग्रह गरे ।