पोखरा । माउण्ट अन्नपूर्ण सेकेन्डरी स्कुलले प्रथम सुजिना स्मृति बास्केटबल प्रतियोगिता सुरु गरेको छ ।

विद्यालय परिसरमा सुरु प्रतियोगितामा विभिन्न विद्यालयका २२ टिमले भाग लिएका छन् ।

गत वर्ष देखि सुरु गरिएको एसइई कपलाई यस वर्ष भने गत वैशाख १८ मा सडक दुर्घटना ज्यान गुमाएकी कक्षा १२ की छात्रा सुजिना तिलिजा पुनको स्मृतिमा आयोजना गर्ने निर्णय विद्यालयले गरेको हो ।

प्रतियोगिता उद्घाटन समारोहमा पोखरा ३ का वडाध्यक्ष प्रकाशमान उदासले वडामा रहेको माउन्ट अन्नपूर्ण मावि सो क्षेत्रकै सबैभन्दा पुरानो र उत्कृष्ट निजी विद्यालय रहेको र यस विद्यालयले अवलम्वन गरेका खेलकुद लगायतका अतिरिक्त क्रियाकलापमा वडाको सधैं सहयोग रहने बताए ।

कक्षा १२ की छात्रा सरस्वती शाहीको अध्यक्षतामा भएको उद्घाटन समारोहमा सुजिनाकी आमा मीना तिलिजा पुनका साथै अन्य आफन्तजन, विभिन्न संघसंस्थाका प्रतिनिधि, वडा प्रहरी कार्यालय बगर र नदीपुर प्रहरी बिटका प्रमुखहरु, विद्यालयका अध्यक्ष लगायत निर्देशक र आदर्श मावि कुस्माका शिक्षकहरुको पनि उपस्थिति थियो । प्रतियोगिता शुक्रबारसम्म चल्नेछ । प्रतियोगितामा प्रथम, द्वितीय र उत्कृष्टलाई क्रमशः ११, ६ र १ हजार नगद पुरस्कार दिइनेछ ।