पोखरा । पर्यटकीय नगरी पोखरामा सुविधासम्पन्न बसपार्क सधैं चुनावी मसला बन्दै आएको छ । दलहरुले रहेक चुनावताका आफ्नो एजेण्डामा बसपार्क समेटे पनि पोखरेलीको आशा पूरा हुन सकेको छैन ।

यसैबीच, पोखराका नवनिर्वाचित मेयर धनराज आचार्यले भने यसलाई गति दिने बताउँछन् । भन्छन्, ‘अबको ३ वर्षभित्र पोखरा बसपार्क निर्माण भइसक्छ ।’

बुधबार पोखरा बसपार्कमा नाला निर्माण काम सुरु भएको छ । गण्डकी प्रदेशका भौतिक पूर्वाधार, सहरी विकास तथा यातायात व्यवस्था मन्त्री कुमार खड्का र मेयर आर्याले सो कार्यको शिलायास गरे ।

मन्त्री खड्काले नाला निर्माणको काम सुरुवात गर्नु बसपार्क निर्माणकै काम सुरु भएको बताए । उनले प्रदेश सरकारले थाले पनि महानगरले पोखरा बसपार्क निर्माण सम्पन्न गर्ने धारणा राखे । त्यसका लागि प्रदेश सरकार सहयोग गर्न तयार रहेको उनको भनाइ थियो ।

मेयर आचार्यले अबको ३ वर्षभित्र पोखरा बसपार्क बनिसक्ने दाबी गर्दै यसलाई आधुनिक र सुविधासम्पन्न सिटी बसपार्करुपमा विकास गर्ने दृढता व्यक्त गरेका हुन् । जुनबेला बसपार्कका लागि जग्गा अधिग्रहण गरिएको थियो, त्यसबेला बसपार्कको रुपमा निर्माण गर्ने भनिए पनि अब ठूलो बसपार्क भने पोखरा ३२ लामेआहालमा बन्ने उनले बताए । उनले पृथ्वीचोकस्थित बसपार्क र बागलुङ बसपार्कलाई समेत सिटी बसपार्ककै रुपमा विकास गर्ने जानकारी दिए ।

गएको १० वर्षमा पोखराको जनसंख्या बढेर दोब्बर भएको उल्लेख गर्दै अहिले ५ लाखभन्दा धेरै जनसंख्या यहाँ बस्ने गरेको र पोखरा आउजाउ गर्नेसहित गरेर २० लाखको संख्या रहेको उनले बताए । यही अवस्थ मध्यनजर गरी कम्तीमा २० वर्षलाई हेरेर पूर्वाधार बनाउनुपर्ने उनको भनाइ छ ।

निर्वाचन बेला गरिएको वाचाअनुरुप पोखरा प्रवेश गर्ने कोत्रे, ठूलीबिंडी र धोलागिरिबाट प्रवेश गर्नेबित्तिकै पोखरा महसुस गर्ने गरी ३ वर्षमा पूर्वाधार बनाइसक्ने उनको दाबी छ । उनले पोखरा बसपार्कमा देखिएका सबै समस्या हल गरेर बसपार्क निर्माण गरिने भन्दै कसैलाई पनि अन्याय हुन्छ कि भनेर नसोच्न समेत आग्रह गरे । ‘यहाँ केही जग्गाका समस्या छन् । अरु अन्य केही समस्या पनि छन् । ती सबै समस्याको समाधान गरेर हामी ३ वर्षभित्र आधुनिक र सुविधासम्पन्न बसपार्क निर्माण गरिसक्छौं ।

आफू जनताको सेवक भएकाले विकास निर्माणमा सहकार्य गर्न उनले स्थानीयलाई आग्रह गरे । उनले साँझ ६ बजे सिटी बसपार्कबाट हरेक वडाका लागि सर्वसुलभ ढंगले बस चल्ने व्यवस्था महानगरले गर्ने प्रतिबद्धतासमेत जनाए ।

आफूले सपथ लिएको ९ दिन भएको भन्दै उनले दिन गनेर काम गर्ने समेत दोहो¥याए । विगतमा ३ तहका सरकारबीच समन्वय नभए पनि अबका दिनमा केन्द्र, प्रदेश र स्थानीय तह बीच समन्वय भएरै काम हुने उनले बताए ।

पोखरा ९का वडाध्यक्ष दीपेन्द्र मर्सानीले निर्वाचनका बेला बसपार्कबाट नै काम सुरुवात गर्ने प्रतिवद्धता जनाएबमोजिम काम सुरु गरेको बताए । ‘अहिले नाला निर्माणको काम सुरु भएको छ । यसलाई नाला निर्माणको सुरु मात्र नभन्नुहोला ।

मेयर सावले पनि निर्वाचनक्रममा भनिसक्नुभएको छ । यो बसपार्क हामी ३ वर्षभित्र कम्प्लिट बनाइसक्छौं ।’

कार्यक्रममा बसपार्क टोल सुधार समिति अध्यक्ष केशवबहादुर थापा र पोखरा बसपार्क सुधार उपभोक्ता समिति अधयक्ष कमलबहादुर श्रेष्ठ लगायतले बोलेका थिए । पोखरा बसपार्कको जग्गा पोखरा उपत्यका नगर विकास समितिको स्वामित्वमा छ । सो समिति हाल मेयरकै नेतृत्वमा छ ।

२०३२ सालमा नेपाल राजपत्रमा सूचना प्रकाशित गरेर बसपार्कका लागि अधिग्रहण गरिएको उक्त जग्गामा अहिलेसम्म पूर्वाधार बनाइएको छैन । पूर्वमा सेती नदी, पश्चिम ढिकैढिक भएर बैरागीवन जाने बाटो, दक्षिण एयरपोर्टको तारबार र उत्तरमा पृथ्वी राजमार्गभित्रको अधिग्रहण गरिएको २ सय ५ रोपनी हाल खुम्चिएर ८१ रोपनीमात्र सीमित छ ।