पोखरा । नेपाल खेलकुद पत्रकार मञ्च गण्डकीको आयोजनामा छैटौं पोखरा स्पोर्टस् अवार्ड–२०७८ असार १८ मा हुने भएको छ ।

मञ्च अध्यक्ष दीननाथ बरालको अध्यक्षतामा बसेको बैठकले विश्व खेलकुद पत्रकार दिवस अवसरमा पोखरा सभागृहमा सो अवार्ड समारोह गर्ने निर्णय गरेको हो ।

सो अवसरमा लाइफटाइम अचिभमेन्ट अवार्ड, वर्ष खेलाडी पुरुष/महिला, उदीयमान खेलाडी, उत्कृष्ट प्रशिक्षक, उत्कृष्ट खेल संघ र उत्कृष्ट खेल पत्रकारलाई गरी ७ विधामा अवार्ड वितरण गरिने मञ्च महासचिव राजाराम पौडेलले जनाए ।

‘खेल क्षेत्रको विकाससँगै खेलाडीलाई उत्प्रेरणा प्रदान गर्न अवार्ड कार्यक्रमलाई निरन्तरता दिएका हौं,’ मञ्च अध्यक्ष बरालले भने । प्रदेशकै गौरवको रुपमा रहेको कार्यक्रममा सहयोग गर्न सबै खेलप्रेमी महानुभावलाई उनको आग्रह छ ।

कार्यक्रमका लागि उनको संयोजकत्वमा मूल आयोजक समिति गठन गर्ने निर्णयसमेत बैठकले गरेको छ । तयारीका लागि आगामी जेठ २८ मा मञ्चका सदस्यबीच बृहत् भेला हुनेछ ।

मञ्च खेलकुद क्षेत्रमा कलम चलाउने पत्रकारको साझा संस्था हो । मञ्चले २०७२ सालमा प्रथम संस्करणको अवार्ड समारोह गरेको थियो । विगतमा जिल्लास्तरमा हुँदै आएको सो अवार्ड समारोह नेपाल खेलकुद पत्रकार मञ्च गण्डकीको नाममा दर्तासँगै प्रदेशस्तरमा हुन लागेको हो ।