पोखरा । संसदमा पेस भएको गण्डकीको आगामी आर्थिक वर्षको नीति तथा कार्यक्रमसहित निर्माण हुँदै गरेको बजेटमा गण्डकीकै मन्त्रीले बहिष्कार गरेका छन् । ऊर्जा, जलस्रोत तथा खानेपानी मन्त्री हरिशरण आचार्य र उनको मन्त्रालयले नीति तथा कार्यक्रम बहिष्कार गरेको हो । यस्तै, बजेट निर्माण प्रक्रियामा समेत सहभागी नहुने मन्त्री आचार्यले बताए ।

मंगलबार प्रदेश प्रमुख पृथ्वीमान गुरुङले संसदमा नीति कार्यक्रम प्रस्तुत गर्दा प्रदेशका २ जना मन्त्री सहभागी भएनन् । युवा तथा खेलकुद मन्त्री राजीव गुरुङ (दीपक मनाङे) भने आफन्त बिरामी भएको भन्दै मुख्यमन्त्रीलाई जानकारी गराएर काठमाडौं गएका छन् । यता, आचार्यले भने बजेट निर्माणमा असन्तुष्टी जनाउँदै बहिष्कारको सूचना मुख्यमन्त्रीलाई दिएका थिए ।

‘बजेट निर्माणमा हाम्रो मन्त्रालयलाई अपमान गरियो । नीति तथा कार्यक्रममा कतिपय योजना दिएको थिएँ, समेटिएन । सांसदलाई टाउका गनेर बजेट दिने प्रवृत्ति अन्त्य गरेर मन्त्रालयबाट छुट्याउनुपर्छ भनेर भद्र अवज्ञा गरेको छु,’ उनले भने, ‘यो मन्त्रालयकै अवज्ञा हो । म पनि गइनँ । सचिवज्यू पनि जानुभएको छैन ।’ अबका कुनै पनि छलफलमा आफू सहभागी नहुने उनको भनाइ छ । ‘मुख्यमन्त्री कार्यालयमा बसेर अहिले पनि योजना टाइप गरेर बसेका छन् । अर्थ मन्त्रालयले योजना टाइप गरिरहेको छ,’ उनी भन्छन्, ‘मुख्यमन्त्री र अर्थ मन्त्रालयले योजना टाइप गरेर बस्ने हो ? कि मन्त्रालयलाई फरबार्ड गरेर सम्बोधन गराउने हो ?’ उनले बजेटको सिलिङ समेत १ अर्बभन्दा बढी घटेको बताए ।

हरिशरण आचार्यले अडान कायमै राखे उनको ठाउन्मा धनमाया लामा मन्त्री बन्ने सम्भावना खुलै छ

हाल ५८ सदस्य रहेको गण्डकी प्रदेश सभामा जनता समाजवादीका तर्फबाट २ सांसद छन् । जसमध्ये १ मन्त्री आचार्य हुन् । अर्की सांसद धनमाया लामा पोखरेल हुन् । मन्त्री आचार्य मंगलबार सदनमा नगए पनि सांसद पोखरेल भने उपस्थित थिइन् । सरकार बन्ने बेलामा दुवैजनालाई मन्त्री बनाउने गरी भएको सहमति पालना नभएको भन्दै जसपा सुरुदेखि नै असन्तुष्ट छ । सुरुमा आचार्यलाई मन्त्री बनाएपछि लामा झनै रुष्ट थिइन् । अहिले मन्त्री आचार्य सांसद लामाको दोहोरो संवाद नहुने अवस्था छ । मन्त्री पदमा रहने तर नीति तथा कार्यक्रममा भाग नलिएर आचार्यले दिन खोजेको सन्देश भने प्रष्ट भएको छैन । बजेट निर्माणमा सहभागी नहुने उनको प्रतिक्रियाले सरकार धरापमा पर्ने देखिए पनि त्यस्तो अवस्था भने सिर्जना नहुने जानकार बताउँछन् । मन्त्री आचार्यले यही अडान कायम राखे उनको ठाउँमा धनमाया लामा मन्त्री बन्ने सम्भावना भने खुलै छ ।

अर्थमन्त्रीसँग रुष्ट

आचार्यमात्रै होइन, गण्डकीका अन्य मन्त्रीहरु समेत अर्थमन्त्री रामजी बरालसँग रुष्ट बनेको बुझिएको छ । केही समयअघि बजेट विनियोजित भएका कार्यक्रम कार्यान्वयनमा समेत मन्त्रालयको फाइल अड्काएको आरोप खेपेका उनी अहिले बजेटमा एकलौटी गरेको अर्को आरोपमा मुछिएका छन् । अहिले गण्डकी सरकारले नीति तथा कार्यक्रममा स्वास्थ्यलाई जोड दिएको छ । एक मन्त्रीका अनुसार स्वास्थ्य माओवादीको भागमा परेकोले बढी फोकस भएको हो । ‘विरोध गर्दा स्वास्थ्यको कार्यक्रममा विरोध गरेजस्तो देखिन्छ । तर भित्री मनसाय स्वास्थ्य राम्रो बनाउने भन्ने होइन । आफ्नो पार्टीका मन्त्रीले सम्हालेका मन्त्रालयमा फोकस गरिएको छ,’ ती मन्त्रीले भने, ‘यही विषयमा धेरै पटक चर्काचर्की नै भएको छ ।

मुख्यमन्त्रीले अर्थमन्त्री र सम्बन्धित मन्त्रीहरुलाई छुट्टाछुट्टै राखेर सम्झाउनुभएको थियो ।’ क्याबिनेटकै केही मन्त्रीहरुले अर्थमन्त्रीको काम सुधार नभए राजीनामा दिने चेतावनी मुख्यमन्त्रीलाई दिएको स्रोत बताउँछ । यसबारे बुझ्न खोज्दा अर्थमन्त्री बरालको फोन उठेन ।