पोखरा । नेपाल पुँजीबजार लगानीकर्ता संघका पदाधिकारीले नेपाल राष्ट्र बैंकका गभर्नर महाप्रसाद अधिकारीसँग भेटवार्ता गरेका छन् ।

मंगलबार भएको भेटमा सेयर बजारको पछिल्लो अवस्था, ४ः१२ करोडको क्याप, सिडी र सिसिडी रेसियोलगायत विषयमा छलफल भएको छ ।

लगानीकर्ताले राखेको जिज्ञासामा गभर्नर अधिकारीले समग्र अर्थतन्त्रको अवस्थालाई ध्यान दिंदै समस्यालाई गम्भीर रूपले लिएका बताए । उनले समस्या समाधानका लागि सहजीकरण गर्ने पनि बताएका छन् ।

लगानीकर्ता संघका पदाधिकारीले आइतबार प्रधानमन्त्री शेरबहादुर देउवासँग पनि भेटवार्ता गरी समस्या राखेका थिए। चालु आर्थिक वर्षको मौद्रिक नीतिले सेयर बजारमा कडाइको नीति लिएपछि परिसूचक लगातार ओरालो लागिरहेको छ । उक्त समस्या आगामी आवको मौद्रिक नीतिमार्फत समाधान गर्न माग गर्दै लगानीकर्ता संघले सरोकारवाता निकायसँगको भेटघाट तीव्र पारेको छ ।