तनहुँ । चट्टान आरोहण अर्थात् रक क्लाइम्बिङका लागि ख्यातिप्राप्त तनहुँको चुनपहरो संरक्षणका लागि अभियन्ताले ३ विकल्प अघि सारेका छन् । स्तरोन्नतिक्रममा पृथ्वीराजमार्ग ४ लेनको बन्दा यससँगै जोडिएको चुन पहरो कटानमा पर्ने भएपछि अभियन्ताले संरक्षणको अग्रसरता देखाएका हुन् ।

बन्दिपुर गाउँपालिका–४ स्थित बिमलनगरमा रहेको १ किलोमिटर लामो यो पहरो जोगाउन सडक पूर्ण ४ लेनको बनाउनुको सट्टा सवारीसाधनलाई पुलबाट मस्र्याङ्दी तारेर एकतर्फी बनाउने विकल्प अघि सारिएको अभियन्तामध्येका एक लालकुमार श्रेष्ठले जानकारी दिए । पोखरातिरबाट जाने सवारीसाधनलाई पहरो नजिकै रहेको बिमलनगर पुलबाट डाइभर्ट गरी १ किलोमिटर तल नयाँपुलमा निकालेर पुनः राजमार्गमा जोड्ने योजना अभियन्ताले सुनाएका हुन् ।

यसैगरी, सडकलाई मस्र्याङ्दी नदीतर्फ विस्तार गरी स्तरोन्नति गरे पनि पहरो जोगिने अर्को विकल्प देखाइएको छ । त्यस्तै सवारीसाधनमात्र पास हुने गरी पहरोको केही भागलाई मात्र कटान गर्न सकिने विकल्पसमेत सुझाइएको छ । उल्लेखित विकल्पमध्ये सडकलाई वान वे बनाई सवारीसाधनलाई मस्र्याङ्दी नदी पार गराउने विकल्पमा सहमति जुट्न लागेको अभियन्ता श्रेष्ठले बताए । यो विकल्पअघि बढाउँदा डिपिआर परिवर्तन गर्नुपर्ने कुरा आएको र सोही कारण विषय टुंगोमा पुग्न समय लागेको बुझाइ उनको छ ।

एसियाली विकास बैंकको आर्थिक सहयोगमा मुग्लिनदेखि पोखरासम्म पृथ्वीराजमार्ग स्तरोन्नति गर्न करिब २८ अर्ब रुपैयाँ लागत लाग्ने हिसाब सार्वजनिक भएको छ । राष्ट्रिय राजमार्गको स्तरोन्नति र बिस्तार गर्ने कार्यक्रमअन्तर्गत हाल २ लेनमा रहेको पोखरादेखि मुग्लिनसम्मको ९३ किमी लामो सडक बिस्तार गर्न २ चिनियाँ कम्पनीलाई जिम्मा लगाइएअनुरुप कामसमेत सुरु भइसकेको छ । सडक बिस्तार भएपछि दुईतर्फी २५/२५ मिटर चौडाइको हुनेछ । बस्ती धेरै भएको ठाउँमा भने ४१ मिटर चौडाइको सडक बन्ने जनाइएको छ ।

सडक विस्तार कार्यबाट चुनपहरोलाई जोगाउँ भन्ने सन्देश प्रवाह गर्न स्थानीयले गत पुस महिनामा यहाँ रक क्लाइम्बिङ महोत्सवसमेत आयोजना गरेका थिए । पर्यटकीय महत्व बोकेको र साहसिक गतिविधिका लागि प्रख्यात यो पहरोमा रक क्लाइम्बिङ र हिमाल आरोहणपूर्व गरिने अभ्याससम्बन्धी गतिविधिसमेत संचालन हुने गरेका छन् । ७० मिटर अग्लो चुनपहरोमा क्लाइम्बिङका लागि २८ वटा बाटोहरु मार्किङ भइसकेको र यस्ता ५ सय वटासम्म बाटो बनाउन सकिने दाबीसमेत श्रेष्ठले गरेका छन् । पहरोले गर्दा बिमलनगरको पर्यटकीय भविष्यसमेत उज्ज्वल रहेको र बाटोसँगै जोडिएका कारण पोखरा तथा अन्नपूर्ण क्षेत्रको भ्रमणमा जाने पर्यटकले समेत यहाँ रमाउन सक्ने अवस्था श्रेष्ठले स्मरण गराए ।

पहरोको थप विकासका लागि गुरुयोजना बन्नेक्रममा रहेको र गुरुयोजनामा पहरोसँगै सिसाको पुल हाल्ने, मस्र्याङ्दीको पानी तानेर क्यानोनिङ संचालन गर्ने, पहरोमाथि रिसोर्ट खोल्ने तथा सँगै रेल कुँदाउनेसम्मका योजना समेटिने उनले सुनाए । पहरोमा तालिम लिन आउनेले प्रतिव्यक्ति प्रतिदिन १ सय रुपैयाँ तिर्नुपर्ने नियम रहेको छ । उठेको रकम सरसफाइलगायत कामका लागि खर्च गर्ने गरिएको छ । पहरो मुन्तिर हाल शौचालय र त्यहाँसम्म पुग्न सिंढीहरु निर्माण गरिएको छ । खानेपानीको व्यवस्था गर्ने पहल भइरहेको जनाइएको छ ।

विमलनगर बजार नजिकै एसियाकै ठूलो दाबी गरिएको सिद्ध गुफा, च्याङ्लीको विशाल गाई फाराम, पर्यटकीय क्षेत्र बन्दीपुर, घलेगाउँ, तनहुँसुर, राइनासकोट, आँधिमुहान र छिम्केश्वरी जस्ता स्थलका कारण पनि यस क्षेत्रको पर्यटकीय सम्भावना धेरै रहेको सिद्धगुफा विकास समितिका संस्थापक अध्यक्षसमेत रहेका श्रेष्ठले बताए ।