पोखरा । पोखरा विश्वविद्यालय र नेपाल विज्ञान तथा प्रविधि प्रतिष्ठान (नास्ट) बीच विज्ञान तथा प्रविधिको अध्ययन अनुसन्धानात्मक तथा शैक्षिक क्षेत्रका विधामा आपसमा सहयोग आदानप्रदान गर्ने उद्देश्यले समझदारी भएको छ ।

समझदारीपत्रमा विश्वविद्यालयतर्फबाट उपकुलपति प्राडा प्रेमनारायण अर्याल र नाष्टतर्फबाट उपकुलपति डा. सुनिलबाबु श्रेष्ठले हस्ताक्षर गरेका छन् ।

सहमतिअनुसार दुवै संस्थाबीच वैज्ञानिक तथा प्राविधिक जनशक्ति, सीप र भौतिक सुविधाहरूको यथोचित सदुपयोगमा सहयोग आदानप्रदान हुनेछ भने समसामयिक विषयहरूमा कार्यशाला गोष्ठी, तालिम, सेमिनार, अनुसन्धान परियोजना सञ्चालन गरिनेछ ।

साथै विज्ञान तथा प्रविधिको विभिन्न क्षेत्रमा विश्वविद्यालयको स्नातकोत्तरतह एवम् विद्यावारिधिस्तरका शोध निर्देशन कार्यमा आपसी स्वीकृतिमा नास्टका उपलब्ध प्राज्ञ तथा वरिष्ठ वैज्ञानिकहरूको पनि संलग्नता गराइने जनाइएको छ । यस्तै, दुवै संस्थालाई संयुक्तरूपमा विज्ञान तथा प्रविधि उन्नययन, जैविक विविधता, पर्यावरण, दिगो सहरी विकाससम्बन्धी अध्ययन अनुसन्धानका लागि सहकार्य गरी अघि बढ्न बाटो समेत खोलेको छ ।