पोखरा । विश्व वातावरण दिवस अवसरमा समाजसेवी एवं व्यवसायी टीका गुरुङले पोखरा सहरकेन्द्रित वातावरणसम्बन्धी काम गर्ने संस्था ग्रिन युथ एलाइन्स नेपाललाई सहयोग गरेकी छन् । उनले सो संस्थाको लागि १५ हजार नगद सहयोग गरेकी हुन् ।

६ वर्ष पुरानो सो संस्थाले पोखरा महानगरसँग मिलेर विद्यालय वातावरण शिक्षा, सहरी योजना आयोगसँग मिलेर पोखरा ९ नयाँबजार सडक छेउमा वृक्षरोपण, पोखरा १ र ३को सिमाना तुलसीघाटमा नदीछेउमा वृक्षरोपण, पोखरा २ , ३, ४, ५, ८, १० र ११ मा सडक छेउ वृक्षरोपण सम्भाव्यता अध्ययन गरिसकेको छ । विशेषगरी सहरी क्षेत्रको वातावरणसँग सम्बन्धित रहेर काम गरेको संस्थालाई आर्थिक सहयोग गर्न पाउँदा खुसी लागेको टीका गुरुङले बताइन् ।

रामघाट सेतीनदी तीरभीर पोखरा ९ छेउका भूस्खलन प्रभावितलाई न्युनतम स्वास्थ सेवा उपलब्ध गराउने उद्देश्य साथ बतास फाउन्डेसन र गण्डकी मेडिकल कलेजसँग मिलेर वातावरण प्रभावित स्थानीयलाई स्वास्थ सेवा पनि उपलब्ध गरेको संस्थाका अध्यक्ष राजन श्रेष्ठले बताए ।