पोखरा । पोखरा महानगरपालिका १, पुरानो टुँडिखेलमा निर्मित बास्केटबल कोर्टको उद्घाटन गरिएको छ ।

पोखरा १ को बुद्धटोल युवा क्लबको पहलमा निर्मित उक्त बास्केटबल कोर्टको उद्घाटन गण्डकी प्रदेशका युवा तथा खेलकुद मन्त्री राजीव गुरुङले गरेका हुन् ।

बास्केटबल कोर्ट निर्माणका लागि युवा तथा खेककुद मन्त्रालयबाट ९ लाख रुपैयाँ आर्थिक सहयोग गरिएको बास्केटबल कोर्ट निर्माण समितिका अध्यक्ष तथा युवा व्यवसायी हिटलर घलेले जानकारी दिए । उनका अनुसार बुद्धटोल क्लबले ५ लाख र राष्ट्रिय उच्च माविले १ लाख सहयोग गरेको थियो ।

व्यक्तिगतरुपमा पनि कोर्ट निर्माणका लागि आर्थिक सहयोग गरेको अध्यक्ष घलेले बताए । ‘युवा तथा खेलकुद मन्त्रालयको लागतमा निर्माण गरेका हौं,’ उनले भने, ‘यसमा क्लबको पनि केही परेको छ केही व्यक्तिहरुको पनि सहयोग छ ।

अहिले पहिलो चरणको काम सकिएको छ । अब अर्काे चरणमा प्यारापिट तथा चेन्जिङ रुमको योजना छ ।’ उक्त उद्घाटनक्रममा विभिन्न ४ टिमलाई मैत्रीपूर्ण खेल आयोजना गरिएको थियो ।