पोखरा । देउवा सरकारको सत्ता साझेदार दल नेकपा एकीकृत समाजवादीले मन्त्री हेरफेर गरेको छ । आइतबार बसेको पार्टीको सचिवालय समिति बैठकले यसअघि सरकारमा रहेका ४ जनालाई फिर्ता बोलाएर नयाँ ४ जनाको नाम प्रधानमन्त्री शेरबहादुर देउवालाई बुझाएको छ ।

देउवा नेतृत्वको सरकारमा नेकपा एसका तर्फबाट यसअघि विरोध खतिवडा, रामकुमारी झाँक्री, प्रेमबहादुर आले, कृष्णकुमार श्रेष्ठ मन्त्री थिए भने भवानी खापुङ राज्यमन्त्री थिए ।

नयाँ मन्त्रीमा जीवनराम श्रेष्ठ संस्कृति पर्यटन तथा नागरिक उड्डयन, मेटमणि चौधरी सहरी विकास, शेरबहादुर कुँवर श्रम, रोजगार तथा सामाजिक सुरक्षा मन्त्री बन्नेछन् । हीरा केसी स्वास्थ्य तथा जनसंख्या राज्यमन्त्री बन्ने बताइएको छ । अघिल्लो सरकारका स्वास्थ्य राज्यमन्त्री भवानी खापुङ स्वास्थ्य तथा जनसंख्या मन्त्री बन्नेछन् ।

नेकपा एसका अध्यक्ष माधवकुमार नेपालले मन्त्री हेरफेर हुनु नियमित प्रक्रिया भएको बताएका छन् । ‘यो नियमित प्रक्रिया हो । पहिले पनि हामीले छ महिना भनेका थियौं,’ ‘सुरूदेखि नै ६ महिनाका लागि भनिएको हो । यो नियमित प्रतिक्रिया हो ।’

नयाँ मन्त्रीहरू मेटमणि चौधरी, जीवनराम श्रेष्ठ, भवानी खापुङले सोमबार सपथ ग्रहण गर्ने बताइएको छ ।