पोखरा । घारीपाटन बचत तथा ऋण सहकारी संस्थाले सदस्यको क्षमता अभिवृद्धिका लागि सहकारी शिक्षासम्बन्धी तालिम प्रदान गरेको छ ।

शनिबार भएको तालिममा प्रशिक्षक पोखरा महानगर सहकारी संघका अध्यक्ष बलराम गौतम र नेफ्स्कुन केन्द्रीय सदस्य कमला गिरीले सकारात्मक विचार, सहकारीमा अवसर र चुनौती, सहकारीमा सञ्चालक समिति तथा कर्मचारीको भूमिका साथै सदस्यले जान्नुपर्ने सहकारीका नियम लगायतका विषयमा प्रशिक्षण दिए ।

२०७५ सालमा स्थापना भएको सहकारीमा हाल ४ सय २२ शेयर सदस्य रहेको र सहकारीको पुँजी १ करोड ६३ लाख रुपैयाँ रहेको सहकारीका अध्यक्ष कृष्णकला केसी बताइन् ।

राष्ट्रिय सहकारी गण्डकी प्रदेश समन्वय समितिका सदस्य तेजनारायण अधिकारीले सहकारीमा सेयर सदस्य महत्वपूर्ण हुने बताउँदै सहकारीलाई गम्भीर भएर सोच्न सुझाव दिए । एक सहकारी एक उत्पादनमा जोड दिनुपर्नेमा अधिकारीको जोड छ । उनले इमान्दारीपूर्वक व्यवसाय गर्ने ठाउँ सहकारी भएको बताउँदै सहकारीले प्रत्यक्ष रुपमा रोजगारी प्रदान गरी आर्थिक, सामाजिक उत्तरदायित्व लगायतका कार्यले राष्ट्रलाई नै अमूल्य योगदान दिएको उल्लेख गरे ।

संस्थाको सञ्चालक सदस्य प्यारी गुरुङले स्वागत गरेको कार्यक्रममा शिक्षा समिति सदस्य राजन जोशीले सहकारीका सात सिद्वान्तबारे प्रष्ट पारेका थिए । कार्यक्रम सञ्चालन सचिव लिलबहादुर जिसीले गरेका थिए ।